Portavós PNTL, Superintendente Xefe Arnaldo de Araújo. Imajen Tatoli/Eugénio Pereira

DILI, 23 novembru 2020 (TATOLI)- Durante semana kotuk, Komandu Jerál Polísia Nasionál Timor-Leste (PNTL) rejista, ema na’in-tolu mate no na’in-22 sofre kanek todan.

Tuir dadus ne’ebé Komandu PNTL rekolla iha semana  kotuk, mosu asidente tráfegu bus ida baku fila iha área Suku Gariuai, Postu Administrativu Baucau Vila, Munisípiu Baucau, rezulta pasajeiru feto-ida mate fatin no balun kanek todan.

Iha Munisípiu Bobonaro mós rejista kazu dezastre naturál, anin boot iha área Batugade, Bobonaro, rezulta uma monu haneha mate avó ferik ida.

Iha área Ponte Nunura, Munisipiu Bobonaro, PNTL rejista mós asidente tráfegu motór ida monu rezulta vítima membru korpu Bombeiru, Seminario Barros mate iha segunda kalan.

“Iha asidente hamutuk tolu, rezulta ema na’in-tolu mak mate, ema na’in 22 kanek kaman, agora hala’o tratamentu saúde iha ospitál,” portavós Komandu Jerál PNTL, Superintendente Xefe, Arnaldo de Araújo, ohin, informa ba jornalista. Iha Komandu PNTL, Caicoli, Dili.

Iha Munisipiu Liquiça mós PNTL rejista kazu violénsia doméstika ida ne’ebé akontese, vítima feto ida hetan baku hosi nia kaben rasik, kazu ne’e parte PNTL halo ona investigasaun.

PNTL Liquiça rejista mós dezastre naturál anin no udan sobu baraka ne’ebé Governu Timor-Leste harii iha área Plila, Aldeia Raucasa, Suku Lauhata, Postu Administrativu Bazartete, Munisípiu Liquiça, hodi prepara ba selebrasaun festa Proklamasaun Independénsia ba dala-45  (28 novembru 1975-2020).

Akontesimentu ne’e la rezulta ema ruma mate no kanek, maibé tenda hirak ne’ebé kada liña ministériu sira harii barak maka hetan estragus.

Tuir observasaun Tatoli nota, tenda hirak ne’ebé anin sobu, ohin, ekipa liña ministériu-sira komesa hadi’a ona hodi kontinua realiza atividade feira  oin-oin iha fatin refere.

Jornalista   : Eugénio Pereira

Editór        : Francisco Simões

 

HAKEREK NO HATÁN

Please enter your comment!
Please enter your name here