Vise-Ministra Finansa, Sara Lobo Brites. Imajen TATOLI/Egas Cristovão

DILI, 23 novembru 2020 (TATOLI)—Tuir portál transparénsia, ezekusaun orsamentál Governu ba tinan fiskál 2020 to’o loron sesta (23/11) meudia atinje ona 58,6%.

Haree ba kuaze tama tinan fiskál ne’e liga ho ezekusaun atuál, maka Ministra Finansa ein ezersísiu, Sara Lobo Brites, hateten atu atinje ezekusaun ba Orsamentu Jéral Estadu (OJE) 2020 ho di’ak presiza apoia ministériu no instituisaun Estadu hotu.

“Sistema ami garante hotu atu fó apoiu tomak, maibé presiza mós esforsu ministériu idaidak atubele atinje taxa ezekusaun di’ak,” tenik governante ne’e hafoin reuniaun semanál ho Primeiru-Ministru, Taur Matan Ruak iha Palásiu Governu, segunda ne’e.

Tanba ne’e, Vise-Ministra Finansa, hateten presiza kontribuisaun entidade hotu ne’ebé iha sistema nia laran.

Nia garante iha novembru nia rohan bele iha progresu ezekusaun OJE 2020 bele sa’e, ho kálkulu to’o iha dezembru bele atinje mínimu liu 80%.

Progresu ezekusaun ne’ebé Agência TATOLI asesu, orijen $1.497.042.620.00, kompromisu $98.269.700,96, obrigasaun $39.177.421,76, ezekusaun atuál $838.773.705,56, saldo hela $520.786.126,2

Entretantu despeza tinan fiskál 2020 hamutuk biliaun $1,497,1 (la inklui atividade finansia husi doadór sira ho valór millaun  $184), ne’ebé prevee ba saláriu no vensimentu millaun $206,7, bens (sasán) no servisu millaun $499,3, transferénsia públika millaun $568,7, kapitál minór millaun $8,9 no kapitál dezenvolvimentu millaun $213,4.

Husi montante orsamentu biliaun $1,496,1, gasta ona balun husi janeiru to’o setembru liuhosi Dotasaun Orsamentu Temporáriu (DOT) no restu orsamentu ezekuta ba outubru, novembru no dezembru 2020.

Hahú janeiru to’o outubru 2020, ezekusaun orsamentu iha rejime duodesimál, ne’ebé durante fulan-10 nia laran, funsaun esensiál Governu kontinua nafatin maibé polítika balun fora husi atividade anuál labele implementa, inklui  projetu infrastrutura importante balun.

Iha proposta  OJE, alokasaun ba kapitál menór no kapitál dezenvolvimentu sei aumenta iha fulan ikus husi orsamentu la’ós DOT 2020, inklui millaun $220,2 ba fundu COVID‐19 atu responde servisu saúde no rekuperasaun ekonómika.

Montante orsamentu biliaun $1,497,1 foti husi fundu petrolíferu millaun $963,9 no montante orsamentu ne’e Rendimentu Sustentável Estimadu (RSE) millaun $544,4 no transferénsia superiór RSE millaun $419,5.

Entretantu reseita naun petrolífera millaun $770,6, komposta husi reseita tributária millaun $165, reseita própria millaun $6,8, doasaun millaun $10,7, jurus millaun $0,5, saldo jerénsia millaun $527,6 no empréstimu millaun $60.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here