Vise-Prezidente Parlamentu Nasionál, Maria Angelina Lopes Sarmento. Imajen Tatoli/Egas Cristóvão

DILI, 23 novembru 2020 (TATOLI)—Parlamentu Nasionál (PN), segunda ne’e, aprova ona votu konfirmasaun ba lei protesaun sivíl no enkamiña kedas dekretu refere ba Prezidente Repúblika hodi halo promulgasaun.

Notísia Relevante: PN sei diskute hikas lei protesaun sivíl iha semana oin

Rezultadu votasaun ba konfirmasaun votu kona-ba lei protesaun sivíl ne’e ho rezultadu votasaun a-favor 59, kontra 0 no abstensaun 1.

“Ita-nia konfirmasaun votu ba dekretu-lei númeru 19/V-Lei Protesaun Sivíl aprovadu no meza prezidénsia sei enkamiña kedas ba Prezidente Repúblika atu hetan promulgasaun tanba tempu aprezenta atu hetan fali promulgasaun 25 novembru agora mai,” Prezidente Parlamentu Nasionál Ein-Ezersísiu atuál Vise-Prezidente Parlamentu Nasionál, Deputada Maria Angelina Sarmento Lopes, anunsia liuhosi plenária ordinária, segunda lokraik ne’e.

Prezidente Komisaun B (Negósiu Estranjeiru, Defeza no Seguransa) no mós reprezenta bankada FRETILIN, Deputadu Agustinho Siqueira “Somotxo” konsidera dekretu-lei refere nu’udar kondisaun ida hodi hasoru situasaun kalamidade públika maibé la’ós atu restrinje ema-nia direitu no liberdade.

“Dala-ida tán lei protesaun sivíl sei la halo deklarasaun estadu emerjénsia maibé lei ne’e kompleta pilár defeza no seguransa. Lei protesaun sivíl la suspende direitu no Liberdade sidadaun nian maibé iha momentu balun sei restrinje ka limita sidadaun ninia direitu ho medida ne’ebé governu sei hasai iha situasaun kalamidade mas lei ne’e iha nesesidade atu moris,” Prezidente Komisaun B ne’e hateten.

Entretantu Vise-Xefe Bankada Partidu Libertasaun Populár (PLP), Deputadu Francisco de Vasconcelos, konsidera dekretu-lei ne’e importante.

“Bankada PLP hakarak halo afirmasaun ba dekretu-lei ne’e importante tanba ita mós la-sees hosi situasaun ne’ebé ke nasaun hotu-hotu sente katak iha pandemia globál ne’e, ita presiza kuadru legál sira atu kompleta lei sira-ne’ebé mak iha hodi proteje ita-nia sidadaun sira. Tanba ne’e mak fó votu a-favór ba dekretu ne’e,” Vise-Xefe Bankada PLP ne’e hateten.

Reprezentante Bankada CNRT, Deputadu Adérito Hugo da Costa, konsidera dekretu-lei ne’e ba kurtu prazu ninian hodi hasoru pandemia COVID-19 hodi troka estadu emerjénsia kada fulan.

“Bankada CNRT ho ninia konsisténsia ba inisiativa ida-ne’e hodi fó votu a-favór ba konfirmasaun ida-ne’e. Lei ne’e atu kompleta sistema nasionál ba protesaun sivíl do que ita kada fulan ita aprova deklarasaun estadu emerjénsia ho siklu ida naruk tebes,” Deputadu Hugo hateten. 

Aleinde ida-ne’e, Reprezentante Bankada Partidu Demokrátiku (PD), Deputadu Elvina Sousa subliña, haree ba importánsia hosi lei baze protesaun sivíl hodi proteje povu hosi pandemia globál ne’e importante.

“Dala-ida tán Bankada Demokrátiku konfirma fali ami-nia votu favorável ba dekretu-lei ne’e,” Reprezentante Bankada Demokrátiku ne’e hateten.

Iha konfirmasaun votu ba dekretu-lei protesaun sivíl ne’e maioria bankada parlamentár sira apoia lei refere.

Parlamentu Nasionál halo votu konfirmasaun hafoin Prezidente-Repúblika, Francisco Guterres “Lú Olo”, veta polítika ba dekretu-lei protesaun sivíl tanba kestiona asuntu sira liga ba deklarasaun kalamidade públika no asepeitu iha restrisaun direitu, liberdade no garantia.

Prezidente-Repúblika konsidera testu hosi dekretu-lei ne’e tenke pondera ho adekuada, loloos no di’ak no konsisténsia ho lei sira seluk. Xefe Estadu mós konsidera iha situasaun alerta, kontijénsia no kalamidade públika iha dekretu-lei ne’e la sufisiente.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here