Parlamentu Nasionál. Imajen Tatoli/ Egas Cristóvão

DILI, 23 novembru 2020 (TATOLI)—Parlamentu Nasionál, ohin, aprova votu kongratulasaun Deputadu Duarte Pacheco hosi Asembleia Repúblika Portugueza, ne’ebé eleitu nu’udar Prezidente Uniaun Interparlamentár (UIP).

Uniaun Interparlamentár (UIP) estabelese iha tinan 1989, iha Genebra, Suiça, ne’ebé reuni parlamentu 179 (uluk 140) hosi nasaun oioin ho objetivu promove pás, demokrasia no dezenvolvimentu sustentável.

Liuhosi Período de Antes da Ordem do Dia, deputadu sira hala’o diskusaun no votasaun kongratulasaun no 18/V kona-ba eleisaun Deputadu Duarte Pacheco Asembleia Repúblika Portugueza sai nu’udar Prezidente Uniaun Interparlamentár. Votu kongratulasaun ne’e aprova ho rezultadu votasaun a-favór 55, kontra 0 no abstensaun 0

“Ho nune’e votu kongratulasaun no 18/V aprovadu,” Prezidente Parlamentu Nasionál Ein-Ezersísiu atuál Vise-Prezidente Parlamentu Nasionál, Deputada Maria Angelina Sarmento Lopes, anunsia liuhosi plenária ordinária, segunda ne’e.

Deputadu Duarte Pacheco hosi Asembleia Repúblika Portugueza eleitu ba Prezidente Uniaun Interparlamentár (UIP) ho rezultadu votu 222 (56%) iha loron 3 novembru 2020 liubá iha Genebra, Suiça. Deputadu Duarte Pacheho nu’udar mós Prezidente UIP nian dala-30.

Kandidatu sira seluk ne’ebé konkore iha eleisaun ne’e mak hanesan Muhamad Sadig Sanjrani hosi Pakistaun, Ajnak Saidov hosi Uzbekistaun no Salma Ataullahjam hosi Kanadá.

Reprezentante Parlamentu Timorense ne’ebé tuir eleisaun ne’e liuhosi video-konferénsia mak hanesan Deputada Veneranda Lemos, Deputadu Adérito Hugo da Costa no Abel Pires.

Membru Parlamentu Nasionál, Deputadu Adérito Hugo ne’ebé hola parte iha prosesu eleisaun ne’e, haktuir reprezenta parlamentu timorense fó votu 3 ba deputadu Duarte Pacheco no to’o ikus mai rezultadu votasaun hetan maioria.

“UIP Timor-Leste nian fó apoia tomak ba kandidatu Deputadu Duarte Pacheco nian hanesan ema ida-ne’ebé iha esperiénsia kleur tebes no dedika ninia karreira tomak nu’udar deputadu iha Asembleia Repúblika Portugál ninian, ho nune’e esperénsia mais sufisiente hodi lidera UIP,” nia subliña.

Deputadu Adérito konsidera deputadu Pacheco koñese didi’ak rejiaun ne’ebé Timor-Leste hola-parte tanba ne’e ho deputadu portugueza eleitu ba UIP bele introdús lian portugés iha intervensaun sira.

“Nia mós kompromete atu introdús língua portugés nu’udar língua ofisiál iha forum UIP ninian, ne’ebé Parlamentu Nasionál Timorense liuhosi grupu nasionál UIP Timor-Leste nian mak konsege loke espasu ba konferénsia UIP ninian hodi uza lian portugés iha intervensaun sira,” Deputadu Adérito Hugo hateten.

Nasaun hirak ne’ebé partisipa iha eleisaun ne’e mai hosi kontinente Áfrika mak hanesan Ágrika Súl, Angola, Arjélia, Cabo Verde no nasaun sira seluk.

Hosi parte kontinente Amérika nian mak Arjentina, Brazil, Kanadá, Xile, Kolómbia, Kuba, Estadu Unidu Amérika, no sira seluk. Hosi parte kontinente Ázia nian mak Arábia Saudita, Kazakistaun, Xina, Timor-Leste no nasaun sira seluk.

Kontinente Europa nian mak hanesan Alemaña, Áustria, Béljika no nasaun sira seluk no hosi Oseánia reprezenta hosi Austrália.

Nune’e mós organizasaun sira-ne’ebé partisipa iha eleisaun ne’e mak hanesan Autoridade Nasionál Palestiniana (ANP), Komunidade uza lian portugés (CPLP-sigla portugés), Konsellu Europa (CdE-sigla portugés), Organizasaun Nasaun Unida (ONU), Organizasaun Nasaun Unida ba Edukasaun, Siénsia no Kultura (UNESCO-sigla portugés), Organizasaun Kooperasaun no Dezenvolvimentu Ekonómiku (OCDE-sigla portugés), Organizasaun Tratadu Atlántiku Norte (OTAN-sigla portugés), Organizasaun ba Seguransa no Kooperasaun iha Europa (OSCE-sigla portugés) no Uniaun Europeia (UE).

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here