Vise-Ministra Finansa, Sara Lobo Brites. Imajen TATOLI/Egas Cristovão

DILI, 23 novembru 2020 (TATOLI)–Ministra Finansa ein ezersísiu, Sara Lobo Brites, relata katak pagamentu ba ajente administrasaun públika iha fulan-novembru 2020 sei atrazu.

“Mai hasoru Primeiru-Ministru hodi atualiza informasaun balun kona-ba pagamentu saláriu, ne’ebé maka iha fulan sira uluk ne’e ami sempre selu sedu entre loron 20 to’o 21 maibé iha fulan-novembru nian atraza oitoan tanba sei atualiza dadus hotu ne’ebé mak hanesan direitu ema nian ba retroativu, over time no promosaun, tanba ne’e mak kontribui ba atrazu,” atuál Vise-Ministra Finansa, Sara Lobo informa hafoin ramata reuniaun semanál ho Primeiru-Ministru, Taur Matan Ruak iha Palásiu Governu, segunda ne’e.

Governante ne’e dehan, tuir loloos segunda (23/11) ne’e funsionáriu sira bele simu ona saláriu, maibé presiza tan loron balun hodi finaliza prosesu.

Maski nune’e, Ministériu Finansa sei halo esforsu maka’as atu halo pagamentu saláriu ba ajente administrasaun públika iha semana ne’e nia laran.

“Semana ne’e nia laran, iha loron 24 ou 25 bele selu ona saláriu ba ajente administrasaun públika, iha sesta liubá ministériu balun haruka ona ba banku no orsida (segunda ne’e) sei selu tan balun, maibé ministériu sira balun iha problema ne’ebé sei rezolve,” Sara Lobo subliña.

Jornalista: Antónia Gusmão

Editora: Julia Chatarina

5 KOMENTÁRIU

HAKEREK NO HATÁN

Please enter your comment!
Please enter your name here