Mota sobu komunidade nia uma rua iha área Mota Ulun, Aldeia Terus Nanis- Ailok-Laran, Suku Bairru-Pité, Postu Administrativu Don Aleixo, Munisípiu Dili. Imajen Espesiál/Jenoveva Noronha

DILI, 23 novembru 2020 (TATOLI) – Udan boot ne’ebé akontese iha sábadu (21/11), halo mota boot sobu uma komunidade nian rua iha área Mota Ulun, Aldeia Terus Nanis- Ailok-Laran, Suku Bairru-Pité, Postu Administrativu Don Aleixo, Munisípiu Dili.

Udan ne’ebé akontese iha tuku 15:30 liu ne’e halo bee tun hosi foho lolon konsege sobu moru no aliserse uma nian, no bee tama halo inundasaun maka’as.

Ho akontesimentu dezastre naturál ne’e, família vítima na’in rua, Jenoveva Noronha Baptista no Maria da Costa husu ba Governu Timor-Leste liuhosi Ministériu Obras Públika (MOP) atu koloka ekipamentu pezadu ba hadi’a mota dalan no harii moru protesaun mota hodi proteje povu livre hosi inundasaun.

“Udan boot iha sábadu lokraik ne’e halo mota tun hosi foho lolon maka’as halo bee tama sobu tiha ami nia moru uma ninin, inklui bee lori sasán balun no sasán balun hetan estragus,” Jenoveva  hateten ba Ajénsia Tatoli via telefone, ohin.

Akontesimentu ne’e la rezulta ema ruma kanek no mate, maibé família uma-kain rua ne’e nia sente trauma, tanba uma hetan estragus.

Nia hatutan, problema mota sobu komunidade nia uma ne’e la’ós foin primeira vés maka akontese, maibé kada tinan rai udan mota boot sempre tama povu nia uma, tanba la iha moru protesaun.

Nia dehan, maioria vítima-sira ne’ebé bee tama sira-nia uma besik foho ninin inklui uma hirak ne’ebé harii besik mota ninin.

Dadus kona-ba família vítima-sira nian  aprezenta ona ba Xefe Suku Aldeia, Terus Nanis hodi aprezenta ba Xefe Suku, Bairru-Pité, João Belo hodi tau konsiderasaun no buka meius ajuda rezolve problema ne’ebé komunidade enfrenta.

Too notísia ne’e hatún Agência Tatoli seidauk halo konfirmasaun ho parte Sekretaria Estadu Protesaun Sivíl (SEPS) no parte Ministériu Obras Públika.

Jornalista   : Eugénio Pereira

Editór        : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here