Fundadór Institutu Superiór Cristál (ISC), Fredérivo Almeida Santos da Costa.Imajen/espesial.

DILI, 23 novembru 2020 (TATOLI)—Fundadór Institutu Superiór Cristál (ISC), Fredérico Almeida Santos da Costa, iha loron 21 fulan-novembru 2020 hakotu ona iis iha Ospitál Nasionál Guido Valadares (HNGV-sigla portugés), no tuir orariu sei haloot iha Semitériu Becusse Dili iha loron 22 fulan-novembru lokoraik.

Iha tuku 15:00 Otl; família sei lori mate-isin bá vizita ikus iha Institutu Superiór Cristál (ISC), iha tuku 16:00 sei selebra misa requen iha Parókia Balide Dili, depois haloot ikus iha semitériu Becusse Dili.

Aureo da Costa nu’udar bei-oan husi matebian ne’e hateten iha tinan 2006, matebian halo tratamentu saúde iha Ospitál Bali depois kontinua bá Surabaya Indonézia tanba sofre moras prostat, hipertensaun no kurasaun.

Depois fila mai Timor-Leste, Fundadór ISC ne’e mós kontinua halo tratamentu rutina iha HNGV to’o hakotu iis iha sábadu findesemana.

“Até foin dadauk iha semana ida ha’u hanesan parte saúde nian, ha’u halo tratamentu ba avo pai iha uma, depois haree avo pai nia kondisaun ladun favoravel entaun lori ba ospitál semana ida, durante loron 10 iha ospitál, tama iha loron 10 no sábadu 21/11 hakotu nia iis iha Ospitál Nasionál Guido Valadares, iha tuku 3:20 Otl,” nia dehan.

“Ho idade ne’ebé avansandu 85, entaun ho komplikasaun sira ne’e hotu, mak halo avo pai la hamutuk ona ho ami,” nia informa ba Tatoli, iha Audian, domingu (22/11).

Entretantu, matebian Fredérico Almeida Santos da Costa, iha oan na’in neen, feto tolu  sei moris no mane na’in tolu mate hotu ona, oan mane ida lakon durante akontesimentu kazu masakre 12 novembru Santa Kruz Dili, ida seluk mate iha ai-laran tanba envolve iha FALINTIL hasoru invazasaun Indonézia no oan mane ida seluk mate tanba moras.

Jornalista : Nelia Fernandes

Editór:Agapito dos Santos

PUBLISIDADEiklan

HAKEREK NO HATÁN

Please enter your comment!
Please enter your name here