DILI, 23 novembru 2020 (TATOLI)—FALINTIL-Forsa Defeza Timor Leste (F-FDTL) fó apoiu ba programa prevensaun no vasinasaun hepatitis B ne’ebé lansa ona husi Ministériu Saúde (MS) ba membru F-FDTL, PNTL no grupu risku sira iha Asosiasaun HAK, Faról Dili, segunda (23/11).
Tenente Koronél Xefe Saúde Militár, Guido de Oliveira, hateten programa vasinasaun ne’e importante atu prevene transmisaun hepatitis ba forsa sira.
Notísia Relevante:MS lansa programa vasinasaun hepatitis B
”Programa ne’e ami hala’o uluk ona iha Kuartel Jenerál halo teste no vasinasaun ba Komponente Naval, Polisia Militár no forsa sira hotu agora saida mak Diresaun Saúde Militár hanoin mak nafatin kontinua programa vasinasaun ba komponente hotu-hotu,” nia informa iha Asosiasaun HAK, segunda ne’e.
Nia hateten ekipa Ministériu Saúde presiza atu halo vasinasaun ba membru F-FDTL kada komponente iha sira idaidak nia fatin.
“Ezemplu ema ne’ebé mak servisu iha kuartel jenerál simu vasinasaun iha kuartel jenerál sira ne’ebé mak servisu iha Polisia Militár, simu vasina iha Unidade Polisia Militár no mós inklui sira ne’ebé servisu iha komponente naval simu vasinasaun iha ne’ebá entaun bainhira halo vasinasaun halo uluk sensibilizasaun informasaun kona-ba hepatitis hafoin halo vasinasaun,’’ dehan Tenente Koronél Xefe Saúde Militár, Guido de Oliveira.
Sintoma hepatitis B husi fulan ida to’o lima maka ema ida febre, isin moras, ulun moras, laran beik no muta, vontade han laiha, diarea, moras kinur no seluk tan.
Faze tratamentu ba moras hepatitis B maka konsumu ai-moruk antivirus ho rutina nune’e bele prevene dezenvolvimentu vírus la’ós atu halakon vírus husi pasiente hepatitis ho totalmente.
Notísia Relevante:Vasina Hepatitis Nu’udar Meiu Prevene Moras
Jornalista : Felicidade Ximenes
Editór:Agapito dos Santos
