Prezidente Konsellu Executivo INCT, Jose Cornelio Guterres. Tatoli/ Egas Cristóvão

DILI, 23 novembru 2020 (TATOLI)—Institutu Nasionál Siénsia no Teknolojia (INCT-sigla portugés) hahú segunda ne’e fó ona formasaun ba dosente hamutuk ema na’in 30 kona-ba metodolojia peskiza.

Prezidente INCT, José Cornelio Guterres, informa materia formasaun ne’e liliu kona-ba métodu avaliasaun, métodu analítiku, analiza dadus no prosesu kolesaun dadus, analiza no deside respondente iha kuantitativu  no kualitativu.

Notísia Relevante :INCT-LIPI Asina MoU Koopera Iha Investigasaun Sientífika

“Formasaun ne’e atu forma dosente sira sai peskizadór ida excelente preparadu atu nune’e bele sai peskizadór ba projetu sira ne’ebé mak INCT sei prepara. Nomós prepara sira atu sai fali dosente peskizadór ka formadór ba sira-nia instituisaun rasik inklui prepara sira atu kontinua estudu ba mestradu no dotoradu,” nia hateten ba jornalista sira iha Matadouro Dili, ohin.

Formandu hirak ne’e maihosi UNTL, UNDIL, UNPAZ no UNITAL, kada instituisaun reprezenta ema na’in rua enkuantu, Institutu Ensinu Superiór Públiku no Privada 14 seluk reprezenta dosente ema na’in ida kada universidade ida.

Formasaun ne’e hahú ona iha loron 23 no sei ramata iha 28 fulan-novembru 2020, ho formadór hamutuk ema na’in 13 ho grau akadémiku dotoramentu (S3) maihosi UNTL, CRISTAL, IOB no UNPAZ ho sira-nia esperiénsia hakerek jornal internasionál inklui iha peskiza tinan barak iha ajénsia internasionál.

Notísia Relevante :INCT hakarak halo peskiza iha área prioridade lima

Jornalista: Tomé Amado

Editór :Agapito dos Santos

HAKEREK NO HATÁN

Please enter your comment!
Please enter your name here