Diretór Ezekutivu CNC, I.P, Hugo Maria Fernandes. Imajen TATOLI/Joanico de Araújo

DILI, 23 novembru 2020 (TATOLI)–Centro Nacional Chega (CNC) no Ministériu Turizmu Komersiu no Industria (MTCI, sigla portugés), ohin, asina nota entendimentu (Mou) ida kona-ba prezervasaun no dezenvolvimentu sítiu istóriku iha Timor-Leste (TL).

Diretór Centru Nasionál Chega, Hugo Maria Fernandes, hateten asina nota entendimentu ne’e sei foku ba prezervasaun no dezenvolve sítiu istóriku hosi períodu 1974-1999.

“Objetivu hosi nota entedimentu ne’e hanesan marka progresu di’ak tebes hosi jestu polítika Governu konstituisionál  da-ualu nian, ne’ebé liuhosi MTkI kompremitidu atu implementa daudaun programa prezervasaun memória pasadu nian liuhosi prezerva no dezenvolve sítiu istóriku hodi bele kontribui ba dezenvolvimentu setór turizmu, istóriku no transferénsia memória pasada ba públiku,” Hugo Maria Fernandes hato’o ba jornalista sira iha salaun konferénsia CNC, Antigu Komarka, Balide, Dili, segunda ne’e.

Hosi nota entendimentu ne’e, Hugo Fernandes hatutan, rekomendasaun ne’ebé CNC hato’o ba MTCI dahuluk mak programa boot ba sobrevivente sira ne’e tenke iha reparasaun tanba ko’alia kona-ba repasaun ne’e iha nia forma koletiva no pesoál.

“Nota entendimentu ne’e, ita haree ba rekomendasaun kona-ba reparasaun, ne’e dahuluk ita harii fila-fali fatin sira ne’ebé uluk violasaun diretu umanu sira-ne’e akontese, hosi ne’e, ita forma koletiva ida. Segundu, ita prezerva nafatin fatin sira-ne’e, hodi fó hanoin nafatin ba ita-nia públiku sira no ba jerasaun foun sira,” nia dehan.

Nia hateten, hosi programa reparasaun ne’e tenke hakbiit sobrevivente sira-nia moris, entaun haree poténsia ida ne’ebé maka fó hosi fatin istóriku sira-ne’e ba poténsia dezenvolvimentu setór ekonómia nian.

“Tanba ita halo programa turizmu klaru involve industria komunidade entaun ita hein katak ho partisipasaun komunidade nian rasik liuhosi konseitu turizmu komunitária, komunidade bele mós foti benefísiu ruma hosi fatin sira-ne’e,” nia dehan. 

Entretantu, konseitu sítiu istóriku ne’ebé sei prezerva ne’e, CNC hatuur iha kategória haat maka hanesan (1) Sítiu sira ne’ebé konsidera nu’udar prizasaun no sentru detensaun sira, (2) Sítiu ne’ebé violasaun direitu-umanu boot sira akontese ba, (3) Sítiu sira ne’ebé ema Timor públikamente espresa sira-nia direitu ba autodeterminasaun, no (4) Sítiu sira ne’ebé konsidera nu’udar abrigu ba rezisténsia armada nian sira.

“Tanba ne’e, iha loron 07 dezembru 2020, ita sei aumenta tan objetu turizmu istóriku ida iha Dili ho inagurasaun memoriál 7 dezembru 1975 ne’ebé mak daudaun ne’e iha ona faze finál konstrusaun nian iha Ponte Cais Dili,” nia informa.

Diretór CNC ne’e esklarese programa nota entendimentu ne’e durasaun tinan lima maibé programa sira-ne’e sei labele implementa dala ida de’it tanba sei liuhosi prosesu.

“Programa asina nota entendimentu ne’e, durasaun ba tinan-lima nian. Entaun ekipa  CNC ho Vise Ministru MTCI nian dahuluk sei tuun halo identifikasaun ba fatin tanba tinan ne’e, foin ita identifika munisípiu neen (6) de’it. Ita hetan ona sítiu istóriku hamutuk 91, nune’e  ita labele halo hotu kedas. Maibé ita hein tinan lima nia-laran, ita sei la’o kompleta hotu kedas fatin ne’ebé mak nesesáriamente presiza,” nia espera.

Iha tinan 2018, nia dehan, CNC dezenvolve no implementa daudaun programa mapamentu sítiu istóriku ne’ebé to’o tinan ne’e nia rohan kompleta ona identifikasaun sítiu istóriku iha Munisípiu Dili, Aileu, Ainaru, Ermera, no Manatuto.

Nia haktuir, iha tinan oin, CNC ho Ministériu MTCI sei harii ekipa ida atu identifika loloos sítiu sira iha munisípiu 12 inklui Rejiaun Administrativa Espesiál Oé-Cusse Ambeno (RAEOA)

Nia dehan, prezerva fatin sítiu istóriku ne’e tenke involve mós fasilidade públiku, maibé fatin sira-ne’e hotu seidauk iha fasilidade ne’ebé mak adekuadu. Tanba bainhira hakarak lori ema ba sítiu istóriku ne’e tenke iha fatin ne’ebé mak mahon hanesan iha kafe ruma, restorante ruma no ema sira bele faan sira-nia produtu.

Entretantu, Ministru Turizmu Komersiu no Industria, José Lucas do Carmo da Silva hateten, nota intendimentu ne’e momentu istóriku foun ida ba instituisaun CNC no MTCI servisu hamutuk ho objetivu oinsá MTCI atu halo promosaun ba turizmu istóriku.

Ministru Turizmu, Komérsiu no Indústria, José Lucas do Carmo Silva. Imajen Tatoli/Egas Cristovão

Governante ne’e hateten, promosaun turizmu istóriku ne’e importante tebes ba públiku atu hatene oinsá mak atu implementa rekomendasaun sira ne’ebé mai hosi CVAR /CVA, ida ne’e presiza halo divulgasaun.

“Objetivu oinsá MTCI hamutuk ho CNC atu halo promosaun ba fatin istóriku, hakarak halo promosaun ba fatin turizmu istóriku sira. Tanba ne’e, ha’u lori Governu nia naran ba oin iha komitmentu boot nafatin servisu hamutuk ho CNC, atu nune’e bele hariku no promove ita-nia istória ba jerasaun foun tuir mai,” nia dehan. 

Jornalista: Osória Marques

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here