Koordenadór Seguransa Destaka PN Foun, Superientendente Asistente Filipe das Quintas. Imajen TATOLI/Evaristo Soares Martins.

DILI, 23 novembru 2020 (TATOLI)—Koordenasaun entre Parlamentu Nasionál (PN) no Komandu PNTL deside Superintendente Asistente Abrão Filipe das Quintas hodi substitui Alexandrino da Costa “Alex Samurai” lidera Gabinete Seguransa iha Parlamentu Nasionál.

Molok ne’e Superintendente Asistente Filipe das Quintas nu’udar Segundu Komandante PNTL iha Munisípiu Manufahi.

Alexandrino da Costa “Aleix Samurai” asume koordenadór seguransa iha Parlamentu Nasionál dezde 2017 no sei transfere fali ba komandu Unidade Espesiál Polísia iha unidade Korpu Seguransa Pesoál (CSP-sigla portugés).

“Ita hetan kooperasaun ida-ne’ebé di’ak tebes hosi Polísia Nasionál Timor-Leste ne’ebé hafoin Polísia Nasionál Timor-Leste deside destaka Inspetór Alexandrino da Costa entaun inspetór to’o ohin loron tinan tolu kedas ona entaun presiza mós mudansa. Entaun, ohin, serimónia entrega ida hosi Inspetór Alexandrino da Costa ba komandante foun asistente superintendente Abrão Filipe das Quintas. Komandante foun mai kontinua de’it servisu ne’ebé iha hela tuir lei ne’ebé previstu LOFAP,” Sekretária Meza Parlamentu Nasionál, Deputada Lídia Norberta dos Santos Martins, informa ba jornalista sira, iha Parlamentu Nasionál, segunda ne’e.

Deputada Lídia esplika, lei númeru 12 /2017, 24 maiu kona-ba Lei Organizasaun no Funsionamentu Administrasaun Parlamentár (LOFAP-sigla portugés) previstu iha artigu 21 (Gabinete Seguransa), alínea 1 hateten Gabinete Seguransa nu’udar koordenada ofisiál seguransa destakadu hosi Polísia Nasionál Timor-Leste, ho postu subkategoria Ofisiál Superiór.

Nia dehan, LOFAP la previstu mandatu koordenadór foun seguransa iha PN maibé troka ne’e hodi iha mobilidade servisu.

Nune’e mós seguransa prestada forma permanente ba destakamentu Polísia Nasionál Timor-Leste no destakamentu ba Diresaun Nasionál Seguransa Patrimóniu Públiku.

Nia dehan, kompete Gabinete Seguransa mak ezerse vijilánsia no protesaun deputadu sira, patrimóniu, pesoál no vizitante iha Parlamentu Nasionál, asegura prevensaun no kombate inséndiu sira iha Parlamentu Nasionál ho di’ak iha kualkér situasaun.

Sekretária Meza Parlamentu Nasionál agradese ba Komandu PNTL ne’ebé sempre apoia PN liuhosi komandante destakadu sira.

“Dezeja no susesu ba komandante Alex Samurai ne’ebé durante ne’e kontribui ona seguransa ba Parlamentu Nasionál no ami mós agradese ba substituisaun foun hosi PNTL mai iha uma fukun,” nia dehan. 

Koordenadór Seguransa Destaka PN Tuan, Komandante Alexandrino da Costa. Imajen TATOLI/Evaristo Soares Martins

Deputada Lídia Martins hakarak informa ba públika katak substituisaun ne’e laiha relasaun ho dezintendimentu entre Alex Samurai ho Deputadu David Dias Ximenes “Mandati” nian maibé mudansa ne’e tanba nesesidade entre Parlamentu Nasionál no komandu PNTL.

“Tanba mandatu ne’e tinan tolu ona, maibé molok dezitendimentu ne’e PN halo tiha karta substituisaun,” nia dehan.

Entretantu, Koordenadór Seguransa PN foun, Superintendente Asistente Filipe das Quintas, hateten sei kontinua servisu ne’ebé koordenadór sesante rai ho baze LOFAP no orientasaun komandu nian.

“Ha’u sei asegura gabinete seguransa tanba antigamente Prezidente Parlamentu Nasionál mak husu tau ofisiál superiór entaun komandu koloka ha’u mai iha fatin ida-ne’e hodi subtitui ami-nia inspetór ne’ebé servisu iha-ne’e,” nia dehan.

Iha fain hanesan, Komandante Sesante, Alexandrino da Costa “Alex Samurai” konsidera mudansa ne’e normál transferénsia orden servisu orientada hosi Komandu Jerál PNTL.

“Mudansa ne’e la’ós akontese iha Parlamentu Nasionál maibé akontese iha fatin hotu-hotu, nu’udar membru prontu kolabora no mudansa saida de’it,” nia hateten.

 Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here