Aktividade feira nasionál iha Lauhata, Liquiçá, domingu (21/11). Imajen TATOLI/António Gonçalves

LIQUIÇÁ, 22 novembru 2020 (TATOLI)–Ministru Asuntu Parlamentár no Komunikasaun Sosiál (MAPKOMS), Francisco Jerónimo, apela ba entidade hotu atu garante estabilidade hodi fó susesu ba feira nasionál iha ámbitu komemorasaun ba loron Proklamasaun Independénsia 28 novembru ba dala-45.

Governu lansa feira nasionál iha Lauhata, munisípiu Liquiçá durante loron lima, hahú loron 22 to’o 28 novembru.

“Atu fó parabéns ba povu tomak hotu, ne’ebé maka hola parte iha prosesu ne’e,  liuliu ministériu hotu ne’ebé maka mai hala’o atividade hodi komemora 28 novembru. Ita presiza garante estabilidade, pás no hakmatek iha fatin ida ne’e, nune’e bele fó susesu ba feira,” Ministru Franscisco hateten iha feira nasionál iha Lauhata, domingu ne’e.

Notísia Relevante: MAE-MTKI lansa feira nasionál iha Liquiça

Aleinde ne’e, prezensa MAPKOMS iha eventu ne’e  maka atu divulga informasaun no servisu ministériu, iha área asuntu parlamentárr no komunikasaun sosiál nian nune’e públiku  bele hatene.

“Atu kontribui ba dezenvolvimentu Timor-Leste, presiza disemina informasaun saida maka relasiona ho atividade komunikasaun sosiál no atividade parlamentár ne’ebé  maka oras ne’e tutela ba ministériu ne’e “, hateten Governante ne’e.

Grupu empreza kiik hamutuk 74 no instituisaun Estadu 23 maka partisipa iha feira nasionál no orsamentu ba eventu ne’e hamutuk $44.000 resin.

Jornalista: Natalino Costa

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here