Labarik-sira iha halimar iha ho ksolok. Imajen Tatoli/Antonio Goncalves

DILI, 20 novembru 2020 (TATOLI) -Reprezentante UNICEF iha Timor-Leste,  Valeri Tatum  husu Governu Timor-Leste atu aselera lejizlasaun tolu importante relasiona ho direitu labarik-sira nian, nune’e bele proteje labarik-sira iha Timor-Leste.

Notísia Relevante : Loron Mundiál Labarik, Xefe Governu Husu Labarik Sira Estuda Maka’as

Reprezentante UNICEF iha Timor-Leste, Valérie Taton, hamutuk ho ekipa hasoru malu ho Primeiru-Ministru, Taur Matan Ruak, iha Palaçio do Governo, segunda (10/11). Imajen/Mídia GPM

“Ami hakarak husu atu bele adopta ka aprova lejizlasaun hirak ne’ebé maka sei pendente hela. Ha’u bele temi tolu iha ne’e, iha kódigu labarik nian, lei protesaun ba labarik no mós lei ba susubeen substituisaun nian,” Valerie Taton iha nia breve palavra, iha selebrasaun loron mundiál ba labarik, sesta ne’e, iha Palaçio do Governo, Dili.

Nia hatutan, lejizlasaun-sira ne’e maka  importante tebetebes no bele hatudu liután kompromisu Governu nian boot liután  atu labarik-sira bele boot tan.

Nia dehan, maske labarik sira la vota no la tuir desizaun Estadu nian, maibé sira nia lian importante tebetebes. Tanba ne’e, kualkér Governu no Estadu halo investimentu ba labarik-sira, tanba konvensaun direitu labarik-sira nian afirma,  labarik-sira iha direitu atu moris boot, livre no asesu ba edukasaun no mós ba protesaun.

Valerie Taton reprezenta UNICEF iha Timor-Leste fó kongratulasaun ba Governu Timor-Leste tanba orsamentu tinan oin Governu  halo aumentu ba área saúde no edukasaun.

“Ha’u hakarak hato’o parabens tebes, ha’u mós hatene katak orsamentu ba nutrisaun aumenta  signifikante, ha’u hakarak kongratula ba ida-ne’e, hatudu katak, iha esperansa no iha asaun ne’ebé atu suporta labarik Timor-Leste ninia  moris,” Valeie Taton tenik.

Nia parte fó obrigadu ba Primeiru-Ministru, Taur Matan Ruak, tanba bele oferese Palaçio do  Governo, hodi  selebra loron mundiál labarik hamutuk ho labarik-sira.

“Ha’u mós hakarak fó obrigadu ua’in ba Exelénsia Primeiru-Ministru, ne’ebé maka fó tempu ba ita bele mai hamutuk iha fatin ida-ne’e (Palaçio do Governo),  hodi selebra loron medial labarik sira nian. Ida-ne’e hatudu katak, kompromisu aas tebes Primeiru-Ministru nian kona ba labarik-sira,” nia afirma tan.

Nia parte mós agradese Prezidente Repúblika  ne’ebé  aseita ona atu hetan entrevista hosi labarik rua entaun obrigada boot tebetebes ba esforsu-sira ne’e hotu.

Reprezentante UNCEF iha Timor-Leste haklaken mós mensajen labarik-sira iha mundu hameno iha ámbitu komemorasaun loron mundiál labarik hodi husu ema hotu tenke uza máskara.

Ministru Prezidénsia Konsellu Ministru, Fidelis Manuel Leite Magalhães. Imajen Tatoli/Egas Cristovão

Iha fatin hanesan reprezentante Governu Timor-Leste nian iha komemorasaun loron mundiál labarik nian ba tinan 2020 ne’e, Ministru Prezidénsia Konsellu Ministru, Fidelis Manuel Leite Magalhães hateten, kona ba kestaun labarik daudaun ne’e iha  progresu boot  asesu ba edukasaun, saúde no seluk tan.

Nia dehan, maske iha labarik balun seidauk hetan asesu no moris iha sitasaun manutrisaun, maibé Governu la nonook atu kontinua tau importánsia ba kestaun labarik-sira iha Timor-Leste.

“Ita bele dehan iha faze tolu maka ita iha tempu  koloniál portugés, labarik barak  la asesu edukasaun, mai tempu indonézia nia persentajen uitoan, maibé agora daudaun persentajen hirak-ne’e hahú muda, labarik barak iha hahú asesu livremente goza nia diretu ba eskola, halimar no seluk tan,”  Ministru Fidelis hateten.

Nia dehan, Governu kontinua tau importánsia liuhosi desizaun-sira ne’e halo hodi nune’e kontinua fó importánsia ba direitu labarik nian.

Hola parte mós iha komemorasaun loron mundiál ba labarik ne’e Vise Ministru Agrikultura no Peska, Abilio Xavier de Araújo,  Embaixadór Xina iha Timor-Leste, Xiao Jiagoa, Embaixadór  Uniaun Europeia, Andrew Jacobs, no reprezentante labarik-sira Timor-Leste nian.

UNICEF iha Timor-Leste organiza selebrasaun loron mundiál ba labarik, tinan ne’e, hetan apoiu hosi Governu Japaun no komemorasaun ne’e loke ho ezibisaun fotografia labarik-sira nian no pintura-sira oioin ne’ebé aprezenta hosi labarik-sira.

Jornalista   : Natalino Costa

Editór        : Francisco Simões

HAKEREK NO HATÁN

Please enter your comment!
Please enter your name here