Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, Imajen TATOLI/Egas Cristovão

DILI, 20 novembru 2020 (TATOLI)—Iha reuniaun Konsellu Ministru (KM), Diretór Ezekutivu Ajénsia Teknolojia Informasaun no Komunikasaun, Institutu Públiku (TIC TIMOR, IP) no Prezidente Komisaun Téknika Eventuál ba Preparasaun Estratéjia Integrada, Roberto Caetano de Sousa Vicente, aprezenta opsaun estratéjika ba implementasaun sistema indikadór únika ba sidadaun.

Ministru Prezidénsia Konsellu Ministru, Fidelis Manuel Leite Magalhães, hateten sistema ne’e sai baze importante atu hadi’a prestasaun efetiva, efisiénsia no planeamentu servisu públiku no asegura jestaun no koordenasaun di’ak liu ba polítika sosiál.

Iha tempu hanesan sei permite kontribui ba konstrusaun estruturada ba governasaun eletrónika iha Timor-Leste.

“Projetu ne’e, ho hanoin ida atu avansa lalais atubele ramata ho tempu, nune’e iha tinan 2023 no 2024 ne’e iha ona baze ne’ebé firme ba indetifikasaun úniku no bele asegura sistema oin-oin iha ita-nia rai, integradu no bele hetan verifikasaun fásil,” Ministru Fidelis, relata liuhosi konferénsia imprensa iha Palásiu Governu, sesta ne’e.

Governante ne’e esplika, indikadór únika ne’e atu uniformiza atribuisaun kartaun sira hanesan eleitorál, rejistu moris, nune’e dijitaliza hodi bele hafasil verfikasaun.

“Kada ema ida sei iha identidade dijitál ida ho númeru ne’ebé atribui ba de’it  kada sidadaun, nune’e bele fásil verifika ema,” nia esplika.

Nune’e, KM apresia inisiativa no lala’ok ne’ebé mak  la’o hela no semana oin mak sei halo desizaun kona-ba projetu ne’e.

“Sei fó tempu ba membru Govenru sira atubele lee ho klean liután ba opsaun estratéjia ne’e, atu iha pergunta ruma bele husu hodi bele deside iha reniuan Konsellu Minsitru semana oin,” Portavós Governu ne’e akresenta.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here