TDD. Imajen Tatoli /Dok

DILI, 20 novembru 2020 (TATOLI)-Tribunál Distritál Dili (TDD), ohin, halo  julgamentu interrogatóriu ba arguidu ho  inisiál JJ ne’ebé deskonfia foti motor la iha koñesimentu hosi na’in iha area Bairru-Pite, Dili.

Defensor Públiku, Afonso Gomes, ne’ebé fó asisténsia  legál ba arguidu hateten,  tuir faktu kazu ne’e akontese iha loron 17 novembru,  tinan ne’e, iha tuku 19:00 Otl,  iha Aldeia São José , Suku Bairru-Pite, Dili.

“Tuir deklarasaun arguidu nian momentu nia ba iha supermerkadu no motor para barak mak arguidu sai hosi loza-laran dudu ema nia motor atu sa’e ho nune’e komunidade-sira duni hodi kaer,” Defensor Afonso Gomes haktuir.

Ministériu Públiku (MP) akuza arguidu ho krime burla agravadu ne’ebé previstu iha artigu 252 hosi lei kódigu penal.

Liu hosi julgamentu primeiru interrogatóriu hafoin Tribunál konklui prosesu MP husu Tribunál aplika medida prizaun preventiva.

Defeza haree katak arguidu laiha intensaun atu foti-subar, maibé tanba desleisu arguidu mós dudu sees motor hodi sa’e.

Defeza husu Tribunál aplika medida prevensaun ida ne’ebé mak justu no adekuadu. Maibé, Tribunál adia fila-fali julgamentu ne’e ba iha loron 21 novembru, tinan ne’e,  tuku 10:00 Otl,  hodi rona leitura akórdaun.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here