Sukursál BNCTL foun iha RAEOA, sesta (20/11). Imajen TATOLI/Antónia Gusmão

OÉ-CUSSE, 20 novembru 2020 (TATOLI)–Banku Nasionál Komérsiu Timor-Leste (BNCTL, sigla portugés) halo konstrusaun ba edifísiu sukursál foun iha Rejiaun Administrativa Espesiál Oé-cusse Ambeno (RAEOA), ne’ebé kompleta ho fasilidade fó atendimentu ba kliente sira.

Diretór Ezekutivu BNCTL, Brígido de Sousa, hateten objetivu investimentu infraestrutura foun ne’e reprezenta no refleta komprímisu Banku Komérsiu ne’e, hodi fornese servisu melloradu liu ba kliente, populasaun no entidade emprezariál iha RAEOA inklui minisípiu seluk.

“Melloramentu ne’ebé ami oferese sai nu’udar kontribuisaun ba dezenvolvimentu lokál iha área infraestrutura. Ami sente onradu ba dezenvolvimentu ne’e inklui dijitaliza fazeadamente sistema atendimentu hodi atinje objetivu hadi’a prestasaun servisu ba kliente no komunidade sira ho lalais, seguru, no benefisia individuál no negósiu sira,” Diretór Brígido de Sousa informa liuhosi diskursu iha ámbitu seremónia inaugurasaun sukursál foun BNCTL iha RAEOA, sesta ne’e.

Nune’e mós, BNCTL hakarak sai banku ne’ebé hetan fiar tanba efisiénsia no efetivu liu no kontribui sai patrosinadór ba promosaun kresimentu ekonómiku no dezenvolvimentu nasionál sustentável.

Tuir Dirijente ne’e, banku nasionál ne’e ninia prezensa iha rejiaun espesiál ne’e hahú kedan hosi tinan 2007 to’o outubru 2020, sukursál ne’e mobiliza ona depózitu hamutuk $3.450.762,77 hosi totál kliente ou konta hamutuk 19.604.

Aleinde ne’e, fó ona kréditu hamutuk $3.322.264,8 ba kliente hamutuk 1.005 no oferese servisu seluk hanesan remeza, dijitaliza pontu entrega hanesan ATM no POS.

Konstrusaun edifísiu foun BNCTL ne’e konklui iha tinan 2 nia laran ho totál kustu $662.000.

Iha seremónia ne’e, ofisialmente entrega ekipamentu hanesan tratór (unidade 2), mákina dulas hare sai foos (unidade 1), motór ba bero (unidade 3) ho ekipamentu peska ba peskadór sira no ró fiber (unidade 1) ba kliente na’in-6 ho valór kréditu $18.500.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here