Estudante Eskola Sekundária Nu.4 Balide. Imajen Tatoli/Dok

DILI, 20 novembru 2020 (TATOLI)- Komandu Polísia Nasional Timor-Leste (PNTL) Munisípiu Dili hasai  alerta ida hodi husu ba estudante finalista Ensinu Báziku Terseiru Siklu no Ensinu Sekundáriu ne’ebé ramata  ezame nasionál iha Dili atu labele halo karavana iha sidade-laran no labele hemu-tua iha  estrada públiku.

Segundu Komandante Polísia Munisípiu Dili, Superintendente Euclides Belo. Imajen Tatoli/Antonio Goncalves

Segundu Komandante PNTL Munisípiu Dili, Superintendente Euclides Belo, husu ba diretór eskola-sira, inklui inan-aman-sira atu kontrola oan-sira labele halo karavana hodi evita asidente tráfegu.

Euclides husu estudante-sira bainhira simu tiha rezultadu ezame di’akliu halo serimónia agradesimentu iha resintu eskola no fila ba idak-idak nia uma hatudu rezultadu hodi ajuda nafatin inan-aman.

Euclides dehan, PNTL rejista esperiénsia barak hatudu ona iha tinan hirak ba kotuk, estudante feto-mane balun simu tiha rezultadu ezame sa’e motór la uza kapasete hasoru asidente tráfegu to’o balun mate.

“Proibidu ba estudante finalista   Ensinu Báziku Terseiru Siklu, Ensinu Sekundáriu ne’ebé remata ezame no simu rezultadu haree fila ba uma apoiu inan-aman. Ami PNTL la fó presaun ba sira, maibé atu aviza atu eduka sira para ajuda inan-aman, tanba ita tenke antesipa asidente bele mosu hodi prejudika sira-nia vida,” Euclides  Belo afirma ba jornalista, ohin, iha Komandu PNTL, Caicoli, Dili.

Nia dehan, bainhira PNTL alerta maka estudante sira la kumpre, PNTL sei halo apreensaun ba motór ka karreta hodi bolu atensaun ba inan-aman no profesór eskola sira atu fó nafatin edukasaun di’ak ba futuru Timoroan sira.

Komandu Jerál PNTL rasik hatún ona orden operasaun konjunta entre, Polísia Dili, Unidade Espesiál Polísia (UEP), Batallaun Orden Públiku  (BOP) no Unidade Polísia Marítima (UPM) hodi halo kontrolu maka’as iha eskola no estrada públiku.

Estudante Eskola Ensinu Báziku Terseiru Siklu, Ensinu Sekundáriu iha kapitál Dili hahú sira-nia ezame final iha loron 16 no remata iha loron 18 novembru 2020.

Ministériu Edukasaun rasik deside ona, rezultadu ezame final iha territóriu Timor-Leste sei fó sai iha fulan dezembru nia laran.

Jornalista   : Eugénio Pereira

Editór        : Francisco Simões

 

HAKEREK NO HATÁN

Please enter your comment!
Please enter your name here