Ministra Saúde, Odete Maria Freitas Belo. Imajen Tatoli /Egas Cristovão

DILI, 20 novembru 2020 (TATOLI)—Governu liuhosi Ministériu Saúde sei kria alojamentu ba parteira sira ne’ebé maka oras ne’e servisu iha postu saúde no sentru saúde iha territóriu Timor-Leste hodi atende lalais inan isin-rua sira bainhira atu partu.

Ministériu Saúde sei implementa kestaun ne’e hafoin aprovasaun proposta Orsamentu Jerál Estadu (OJE) 2021 iha Parlamentu Nasional.

Notísia Relevante:APTL promete redúz kazu mortalidade inan no oan

”Bainhira fatin sira ne’ebé izoladu tebes  mak alojamanetu laiha Ministériu Saúde iha obrigasaun  haree fatin ba parteira sira para hela hodi fó asisténsia saúde ba inan isin-rua sira,” katak Ministra Saúde, Odete Maria Freitas Belo,bainhira partisipa serimonia aniversariu Asosiasaun Parteira Timor-Leste (APTL) ba dala 20 iha Salaun Katedral Dili, sesta ne’e.

Kna’ar parteira sira-nia importante tanba fó asisténsia no mós promosaun saúde direta ba feto no labarik sira nune’e bele hamenus kazu mortalidade inan no oan.

”Ita mos ko’alia kona-ba atinjementu no kapasitasaun parteira sira nian no tenke la’o ho Ministériu Saúde nia padraun ne’ebé mak iha katak labele difikulta sira nia direitu iha futuru tanba ne’e mak koko fahe esperensia ne’ebé mak di’ak ba parteira sira para sira halo servisu ho di’ak liu tan,” tenik tan.

Tuir dadus APTL nia rejista parteira hamutuk 805 maka daudaun ne’e koloka ona iha postu saúde,sentru saúde, ospitál referál no nasionál hodi atende pasiente sira.

Iha fatin hanesan Prezidente Asosiasaun Parteira Timor-Leste, Natalia de Araújo, esplika durante ne’e parteira sira enfrenta problema alojamentu atu hela hodi fó atendimentu ba pasiente liliu inan no labarik.

Notísia Relevante:APTL husu MS kria alojamentu ba parteira sira

Jornalista : Felicidade Ximenes

Editór:Agapito dos Santos

HAKEREK NO HATÁN

Please enter your comment!
Please enter your name here