Ministru Koordenadór Asuntu Ekonómiku, Joaquim Amaral akompaña husi Prezidente Autoridade RAEOA, Arsénio Paixão Bano hasai foto hamutuk ho formandu Sentru Formasaun Profisionál Bansone, iha Sentru Formasaun Bansone, RAEOA, sesta (20/11). Imajen TATOLI/Antónia Gusmão

OÉ-CUSSE, 20 novembru 2020 (TATOLI)-Ministru Koornadór Asuntu Ekonómiku (MKAE), Joaquim Amaral, husu ba joven sira iha teritóriu Timór, liuliu iha Rejiaun Administrativu Espesiál Oé-cusse Ambeno (RAEOA), atu aproveita sentru formasaun profisionál ne’ebé mak Governu harii hodi kapasita-an.

“Ha’u nia mensajen ba joven sira, aproveita sentru formasaun profisionál iha Oé-cusse no iha fatin seluk, nune’e bele prepara-an partisipa iha dezenvolvimentu,” Ministru Joaquim Amaral hateten, iha ámbitu seremónia entrega sertifikadu ba formandu, iha RAEOA, sesta ne’e.

Formandu sira konklui ona formasaun konstrusaun jerál nível 1 no 2 iha área Alvenaria/pedreiru, kanalizasaun, karpintaria, eletrisidade no soldadura, no óspitalidade nível reguler.

Nune’e mós, abertura formasaun konstrusaun jerál nível 1, iha área agrikultura nível 1, no óspitalidade nível 2 reguler, ne’ebé hala’o iha Sentru Formasaun Profisionál (CFP, sigla portugés) Bansone.

Membru ezekutivu ne’e konsidera, momentu ne’e importante tebes tanba sentru formasaun bele prodús tan joven profisionál sira iha área oioin.

“Ida-ne’e momentu importante ba sentru formasaun tanba halo graduasaun ba formandu sira ba dala-rua, ita bele haree katak investimentu ne’e Governu bele koopera ho RAEOA hodi hahú prodús joven kualifikadu,” Joaquim subliña.

Ministru Koordenadór Asuntu Ekonómiku, Joaquim Amaral, entrega sertifikadu ba formandu ne’ebé ramata ona formasaun iha Sentru Formasaun Profisionál Bansone RAEOA. Imajen TATOLI/Antónia Gusmão

Tuir Governante ne’e katak, área sira hanesan alvenaria, kanalizasaun, karpentaria, eletrisidade no soldadura nu’udar área ne’ebé agora merkadu presiza tebes tanba Governu daudaun halo investimentu iha setór infraestrutura, tanba bainhira harii infraestrutura ruma presiza halo manutensaun.

“Infraestrutura sira kuandu harii ona tenke halo manutensaun inklui estrada sira. Tanba ne’e joven sira ne’ebé iha interese tuir formasaun ne’e sinál di’ak tebes tanba iha ona interese ba sentru formasaun profisionál atu prepara-an di’ak liu atubele tama iha merkadu traballu,” nia akresenta.

Hafoin entrega sertifikadu, Ministru Joaquim akompaña husi Prezidente Autoridade RAEOA, Arsénio Paixão Bano no Diretór Sentru Fornasaun Profisionál (CFP, sigla portugés) Tibar, Koordenador CFP Bansone , Simão Tito Barreto, no entidade sira seluk vizita ba salaun formasaun no ofisina sentru formasaun.

“Ha’u vizita sentru formasaun no haree ofisina, sala formasaun no ekipamentu. Ha’u haree ekipamentu sira avansadu, sira (formandu) hatene hili materiál, no kualidade ekipamentu,” nia akresenta.

Iha fatin hanesan, Diretór CFP Tibar no Koordenador CFP Bansone RAEOA, Simão Tito Barreto  agradese prezenta entidade tomak iha atividade importante ne’e.

“Oportunidade di’ak atu kongratula no mós fó rekoñese ba joven sira ne’ebé maka partisipa ona iha prosesu formasaun profisionál iha sentru formasaun profisionál Bansone, ne’ebé serbisu hamutuk ho sentru formasaun profisionál Tibar,” nia hateten.

Nia esplika, formandu hamutuk 29 mak simu sertifikadu husi formandu 45, ne’ebé formandu horak ne’e kompleta iha nível 1 de’it, maibé formandu 29 ne’e iha nível 1 ho 2 mak simu sertifikadu.

“Iha semana hirak liubá, sentru formasaun halo rekrutamentu ba kandidatu foun no ohin halo abertura ba formandu hamutuk 43 ne’ebé maka sira na’in-30 iha área konstrusaun sivíl ba nível 1, 13 iha área agrikultura nian, enkuantu ha nível 2 sira, na’in 9 iha área ospitalidade.

Formasaun ne’e besik tinan-ida, hamutuk ho programa estájiu, formandu ne’e mai husi RAEOA.

Formandu ne’ebé ramata ona formasaun, sei kontinua estájiu profisionál no tuir programa mobile tranning.

Formadór sira enkoraja formandu sira iha inkubadór atu kria negosiu mesak, haree filafali tanba métodu sentru nian úniku oituan, tanba graduadu fulan-ida ka rua sei husu liberdade atu determina saida mak hili ho kapasidade ne’ebé sira hetan tiha ona.

“Kuandu fulan-rua sira la hetan serbisu, sentru sei bolu sira mai kontinua nível formasaun tanba sira sente seidaauk fiar-an, ou keta sira lakohi hetan empregu iha ema seluk karik, ami fó oportunidade iha inkubadór no ikus mai koñesidu hanesan auto empregu ou serbisu ba an-rasik.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here