Produtu Cesta Bázika. Imajen Tatoli/Antónia Gusmão

OÉ-CUSSE, 20 novembru 2020 (TATOLI)–Tuir ajenda, iha sábadu (21/11/), Ministériu Koordenadór Asuntu Ekonómiku (MKAE) sei halo lansamentu distribuisaun Cesta Bázika iha Rejiaun Administrativa Espesiál Oé-cusse Ambeno (RAEOA), maibé deside adia tanba seidauk iha preparasaun produtu ne’ebé sei fahe ba populasaun.

“Programa adia ne’e normál tanba iha dezafíu, la’ós de’it husi parte Estadu maibé kompañia sira ne’ebé atu asume responsabilidade hanesan parseiru hodi fornese. Loos duni iha mudansa no ha’u sei mai fali Oé-cusse, nune’e fó biban ba autoridade atu prepara di’ak liután, ha’u ko’alia ona ho Prezidente Autoridade no promete ona atu halo preparasaun no marka tempu apropriadu para ha’u mai fali halo lansamentu,” Ministru Koordenadór Asuntu Ekonómiku, Joaquim Amaral, hateten hafoin partisipa seremónia inaugurasaun sukursál BNCTL foun iha RAEOA, sesta ne’e.

MKAE nu’udar ministériu implementadór ba programa Cesta Bázika iha ámbitu rekuperasaun ekonómika kurtu prazu ligadu ho pandemia COVID-19 iha Timor-Leste.

Programa ne’e hahú lansamentu nasionál iha postu administrativu Metinaro, tuir fali iha munisípiu Ainaro, no iha munisípiu Covalima.

Governante ne’e dezeja iha dezembru sei halo distribuisaun produtu iha RAEOA tanba programa ne’e dezeña atu implementa iha 2020 nia laran.

Iha fatin hanesan, Prezidente Autoridade RAEOA, Arsénio Paixão Bano, haktuir semana hirak liubá foin asina akordu ho MKAE, kona-ba preparasaun programa iha rejiaun ne’e.

“Agora ami prepara estrutura no mekanizmu, tanba atu akumula produtu lokál ne’e la fásil, entaun ami sei halo esforsu no serbisu hamutuk ho emprezáriu lokál sira atubele sosa produtu lokál,” Prezidente Autoridade dehan.

Cesta Bázika fixa membru idaidak agregadu familiár sei hetan $25, kada fulan iha fulan rua nia laran.

Governu implementa medida haat ho kustu totál millaun $113,4, ba kurtu prazu hanaran mitigasaun impaktu ekonómiku no sosiál ba krize COVID-19, ho objetivu esensiál atu haree ba postu traballu ezistente antes krize no rekupera rendimentu família liuhosi hadi’a empregu no apoiu direitu sidadaun no empreza iha merkadu inklui normaliza hikas atividade ekonómika.

Husi medida haat ne’e, inklui hotu Cesta Bázika, ho totál kustu ba implementasaun hamutuk millaun $71,5 (valór bele iha mudansa) ho objetivu atu fó apoiu ba nesesidade bázika família, kombate hamlaha ba família vulnerável liu, apoiu ba agrikultór, produtór no komersiante lokál.

Jornalista: Antónia Gusmão

Editora: Julia Chatarina  

HAKEREK NO HATÁN

Please enter your comment!
Please enter your name here