Prezidenti Komite 12 Novembru, Gregório Saldanha, Imajen/Antonio Goncalves.

DILI, 20 novembru 2020 (TATOLI)— Komité 12 de Novembru (K12N), ho Resistência Nacional dos Estudantes de Timor-Leste (RENETIL), planea sei komemora tinan 30 Masakre Santa Cruz Dili, 12 novembru 1991 no manifestasaun loron 19 fulan-novembru ne’ebé maka estudante Timoroan sira hala’o iha Jakarta Indonézia.

Prezidente K12N, Gregório Saldanha, hateten komemorasaun ne’e atu fó valór ba juventude loriku as’wain ne’e fakar ran iha masakre Santa Cruz Dili, depois Estudante Timoroan iha Jakarta sira hatutan asaun ne’e ho manifestasaun.

Notísia Relevante:Masakre 12 novembru nu’udar memória ineskesível

“Ha’u hakarak dehan katak, ita nia funu ne’e nakonu ho solidariadade nasionál no internasionál, tanba ita harak selebra fali asaun sira ne’e, atu rekorda fali eroizmu, voluntarizmu  husi ita-nia maluk juventude loriku as’wain sira, halo ona iha tempu ne’ebá,” Gregório hato’o liuhusi konferénsia imprensa ne’ebé hala’o iha sede komite 12 novembru, Balide Kinta ne’e.

Gregório dehan, estudante Timoroan iha Jakarta halo kedas manifestaaun hasoru rejime Soerharto hafoin akontese masakre Santa Cruz Dili.

Nia hateten, tinan oin K12N sei hamutuk ho estudante Timoroan ne’ebé antes ne’e eskola iha Jakarta, Java no Bali, Indonézia atu komemora tinan 30 masakre 12 novembru no asaun solidariadade 19 novembru iha Jakarta, hodi fanu fali sobrevivente no jerasaun foun sira, tanba komemorasaun kada tinan kuaze juventude barak mak la partisipa.

“Tinan rua liubá kotuk, ita hamutuk ona diskute komemorasaun tinan 30 masakre 12 novembru no 19 novembru iha Jakarta ne’e atu sai pakote ida de’it.  Sei ida ne’e mak hotu-hotu konkorda, tinan oin ita la’o hamutuk,”nia subliña.

Nune’e mós reprezentante RENETIL, João Travolta hateten, nu’udár jerasaun iha tempu apertadu, tenta buka malu hodi fó hanoin mós ba malu kona-ba sakrifísiu no voluntarizmu ne’ebé sira halo ona ba rai ida ne’e, maske la bo’ot maibé sira buka atu husik hela ba jerasaun foun sira istória pasadu iha tinan 29 liu-ba.

Notísia Relevante:Masakre 12 Novembru Kontribui Hakotu Okupasaun Indonézia

Jornalista: Tomé Amado

Editór: Agapito dos Santos

HAKEREK NO HATÁN

Please enter your comment!
Please enter your name here