Prezidente Konsellu Executivo INCT, Jose Cornelio Guterres. Tatoli/ Egas Cristóvão

DILI, 20 novembru 2020 (TATOLI)—Prezidente Institutu Nasionál Siénsia no Teknolojia (INCT-sigla portugés), José Cornelio Guterres, hateten Institutu of Bussines (IOB), finaliza ona peskiza iha área edukasaun komérsiu, negósiu, saúde no turizmu.

INCT iha tinan 2019 fó oportunidade ba Universidade da Paz (UNPAS), Universidade Dili (UNDIL), IOB no Institutu Canossa hodi halo peskiza kona-ba area hirak ne’e ho objetivu atu tulun estudante sira bainhira hakerek monografia no mós apoiu Governu para kria polítika ba dezenvolve área turizmu no seluk tan.

“Projetu peskiza ne’ebé mak ita fó ba IOB, UNPAZ, CRISTAL no Insitutu Canossa ne’e iha área edukasaun komérsiu, negósiu, saúde no turismu. husi projetu sira ne’e IOB mak konklui ona ninia peskiza iha área turizmu no agora dadaun rezultadu peskiza ne’e públika ona iha Jornal da Repúblika,” nia inform aba jornalista sira iha salaun Ministériu Ensinu Superiór Siénsia no Kultura, Colmera Dili, sesta ne’e.

Institutu Nasionál Siénsia no Teknolojia aloka orsamentu ba kada peskiza hamutuk $5.000.

Tuir planu ba tinan 2021, INCT sei loke tan peskiza ba Universidade privada no públiku sira iha área oioin.

“Ne’e duni INCT iha ona planu sei konvida dirijente sira husi liña ministeriál sira atu fó materia kona-ba área saida mak sira presiza atu halo peskiza, hodi nune’e bele tulun ministériu sira atu iha mós dadus rasik,” tenik tan.

Jornalista : Tomé Amado

Editór:Agapito dos Santos

HAKEREK NO HATÁN

Please enter your comment!
Please enter your name here