Kliente BNCTL hatudu kartaun ATM P24 hafoin simu husi entidade bankária, iha ámbitu seremónia inaugura sukursál foun BNCTL iha RAEOA, sesta (20/11). Imajen TATOLI/Antónia Gusmão

OÉ-CUSSE, 20 novembru 2020 (TATOLI)Banco Central de Timor-Leste (BCTL), iha esperansa prestasaun servisu Banku Nasionál Komérsiu Timor-Leste (BNCTL, sigla portugés) tuir duni kondisaun sukursál foun iha Rejiaun Administrativa Espesiál Oé-Cusse Ambeno (RAEOA) ne’ebé inaugura ona.

“Ita haree edifísiu BNCTL kapa’as tebes, furak no nabilan, espera atendimentu públiku mós nabilan tuir edifísiu no labele mosu tan protesta no insatisfeitu husi kliente, liuliu iha parte depózitu no kréditu,” Vise-Governadora BCTL, Nur-Aini Alkatiri hateten iha ámbitu inaugurasaun sukursál Banku Komérsiu foun iha RAEOA, sesta ne’e.

Notísia Relevante: MKAE inaugura sukursál foun BNCTL iha RAEOA

Nia husu ba entidade bankária atu aselera lalais kartaun ATM P24 ba banku komersiál hotu ne’ebé opera iha Timor-Leste.

Iha fatin hanesan, Prezidente Konsellu Administrasaun BNCTL, António Víctor kompromete banku ne’e sei presta servisu di’ak hodi fó atendimentu ba kliente.

“Ami kontinua mellora sistema banku, atu nune’e fó atendimentu rápidu, baratu no konviniente ho kliente sira,” nia tenik.

Nune’e mós, Prezidente Autoridade RAEOA, Arsénio Paixão Bano, hateten parte autoridade atu serbisu hamutuk ho BNCTL oferese servisu di’ak liután ba povu Oé-Cusse.

“Ha’u hanoin edifísiu foun ne’e sei fó atendimentu di’ak ba veteranu, ferik-katuas no funsionáriu públiku tomak tanba kompara ho edifísiu tuan, atu simu osan tenke forma iha loron manas,” nia dehan.

Aleinde ne’e, Arsénio Bano mós subliña katak infraestrutura foun ne’e kompleta ona ho fasilidade kompletu no sistema avansadu, inklui bele ajuda setór privadu iha Oé-Cusse oan hodi halo negósiu di’ak liután, nune’e hasa’e rendimentu família.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here