Imajen/Media PR.

ERMERA, 20 novembru 2020 (TATOLI)–Autoridade hosi Postu Administrativu Atsabe, Eugevio Pereira preokupa tebes-tebes ba osan insentivu ho de’it saláriu $140, tanba nu’udar autoridade suku servisu la sura kolen no la sura loron maibé osan ba autoridade lokál kiik tebetebes nune’e presiza hadi’a.

“Ami ami preokupa tebe-tebes ba ami-nia insentivu, ho de’it salariu 140, tanba ita hotu-hotu servisu, ami la sura kolen, maibé, ami hakarak hato’o ba ita-boot sira atu konsidera netik,” Xefe suku Eujévio Pereira hato’o kestaun ne’e perante membru governu sira bainhira husu no hatan, iha ámbitu vizita Prezidente Repúblika, Francisco Guterres, Lú Olo, iha Salaun Parokia Gleno, Ermera, sesta ne’e.

Tuirmai Xefe Suku Domingos Madeira Postu Administrativu Letefoho hateten autoridade lokál ida ne’ebé iha baze servisu la haree ba oras no la haree ba tempu maibé iha lei númeru 9 halo separasaun ba sira.

“Hanesan autoridade lokál ida ne’ebé iha baze, ami servisu la haree ba oras no la haree ba tempu maibé iha lei númeru 9 halo separasaun ba ami, ami hetan insentivu maibé la hetan saláriu, ne’ebé karik ida-ne’e hanesan preokupasaun ami-nian. Ha’u atu hato’o ba Ministériu Administrasaun Estatál (MAE) haree ami-nia problema ida-ne’e,” nia hateten.

Tanba autoridade lokál iha baze, ministériu hotu-hotu konsentra hotu iha baze maibé autoridade lokál nia preokupasaun hanesan funsionáriu level-1 labele fó insentivu maibé fó netik saláriu ida ba autoridade lokál.

Nia mós dehan, MAE presiza hadi’a dekretu lei númeru 9 ne’ebé loke estrutura ne’ebé luan ba Konsellu Suku kompostu hosi juventudade feto no mane, delegadu no delegada ne’ebé fulan neen hetan de’it sira-nia insentivu hamutuk $45.

Imajen/Media PR.

Hatán ba preokupasaun hirak ne’e, Ministru Miguel Pereira de Carvalho hateten, enkuantu pedidu hosi lider komunitáriu sira-ne’e atu lideransa komunitáriu sira bele iha saláriu no labele iha insentivu saláriu ida agora daudauk ne’e. Nia hakarak esklarese iha oportunidade ida-ne’e katak lei 9/2016 ne’ebé hato’o ba suku ne’e hatun ona fó insentivu ba lideransa komunitáriu sira hotu-hotu, la’os saláriu.

“Agora insentivu ne’e lideransa komunitáriu sira hotu-hotu, ha’u ko’alia iha fatin bara-barak, Ermera mós mai ko’alia ona. Ita-nia Estadu fó insentivu ba ita-nia lideransa komunitáriu sira sukat mós kapasidade finanseira Estadu nian,” nia relata.

Bainhira Xefe Suku, Xefe Aldeia sira iha tinan 2005-2006 insentivu ba lideransa komunitáriu sira kuitadu kiik tebe-tebes $15 iha tempu ida ne’ebá, ohin loron depois tinan 17, nia sa’e 10 vezes ba Xefe Suku ida ne’ebé tinan 2005. Purtantu hosi tempu ba tempu MAE sei halo estudu ba pedidu sira ne’e, sei iha nesesáriu atu aumenta.

“Ohin ita-nia lideransa komunitária sira fó sujestaun sira-ne’ebé ha’u rona iha fatin barak ona ami sei konsidera, liuliu hanoin sira sei hatuur iha revizaun ba lei 9/2016, ne’ebé sei halo iha tempu tuir mai. Tanba iha lei númeru 9/2016 fó insentivu de’it ba lideransa komunitáriu sira,” nia haktuir.

Populasaun tomak iha Munisipiu Ermera, administrasaun mak entrega nia traballadór sira no fó saláriu, enkuantu suku hanesan ne’ebé lideransa hosi komunitáriu sira tuir lei fó merese insentivu ida-ne’e mak MAE bele atribui ba suku sira.

Ohin loron insentivu ba lider komunitáriu sira iha Timor laran tomak ne’e Estadu sustenta tinan-tinan ho orsamentu besik millaun $8 ba lideransa komunitáriu hamutuk purvolta 8.234 lideransa komuntáriu komesa hosi Xefe Suku, Xefe Aldeia no mós Konsellu Suku sira.

Kestaun delgadu ho delegada, governante ne’e relata katak osan $45 ne’ebé simu fulan-fulan tinan ida-ne’e, rezolve ona hahú tinan ida-ne’e. Delegadu ho delegada sira-ne’ebé simu de’it $45 ba fulan neen (6) ne’e komesa tinan ida-ne’e, fulan-fulan sei simu $30, tuir fulan hahú hosi tinan ida-ne’e no sei kontinua tinan tuir mai.

Jornalista : Osória Marques

Editór : Cancio Ximenes

HAKEREK NO HATÁN

Please enter your comment!
Please enter your name here