Imajen/Media PR.

ERMERA, 20 novembru 2020 (TATOLI)—Kondisaun infraestrutura bázika hanesan estrada, bee-moos no eletrisidade sei sai hanesan problema ba komunidade iha Munisípiu Ermera. Tanba ne’e, autoridade lokál sira iha munisípiu ne’e preokupa ho situasaun ida ne’e.

Xefe Suku Eujévio Pereira hosi Postu Administrativu Atsabe informa estrada diresaun hosi munisípiu ba to’o postu no suku seidauk di’ak no mós eletrisidade iha suku balun to’o agora komunidade seidauk asesu tanba ne’e mak sai preokupasaun ba komunidade iha Atsabe.

“Atsabe nian, iha baze, ami haree no identifika katak preokupasaun ne’ebé komunidade hasoru mak estrada diresaun hosi munisípiu ba to’o postu no suku. Ida-ne’e, ami komunidade sira hasoru. Eletrisidade iha Atsabe, suku balun to’o agora seidauk asesu,” Xefe suku Eujévio Pereira hato’o kestaun ne’e perante membru Governu sira bainhira husu no hatan, iha ámbitu vizita Prezidente Repúblika, Francisco Guterres, Lú Olo, iha Salaun Parokia Gleno, Ermera, sesta ne’e 

Nune’e mós, Xefe Suku hosi Postu Administrativu Letefoho, Domingos Madeira hateten, preokupasaun iha Postu Administrativu Letefoho inkluzivamente suku sira hanesan Dukurai, Eraulo, Gaulolo, Hatugau, Haupu, Katrai Kraik, Katrai Leten no Lauana mak bee-moos no estrada.

“Iha Postu Administrativu Letefoho, suku ualu, iha suku sira, aldeia balun eletrisidade lakan hela maibé iha aldeia balun seidauk. Ha’u-nia suku rua maka eletrisidade totalmente seidauk lakan; Suku Urahu ho Suku Hatubai. Suku neen seluk iha aldeia balun maka seidauk lakan,” nia hateten.

Tanba ne’e, nia dehan, preokupasaun Postu Administrativu Letefoho ninian, iha suku ualu halai liu ba infraestrutura. Bee-moos iha suku balun, komunidade balun hetan ona maibé balun seidauk. Estrada hosi suku liga ba área rurál sira aat hotu entaun komunidade labele asesu sira-nia produtu ba merkadu. 

Tuirmai, Xefe Suku Ermera Vila Felisberto Soares relata katak bazea ba identifikasaun dadus husi suku 10 hanesan Suku Estado, Humboe, Lauala, Leguimea, Mertutu, Poetete, Ponilala, Raimerhei, Riheu no Talimoro ho totál aldeia 260, kestaun ne’ebé tenke tau ba prioridade mak infraestrutura bázika.

“Liga ba infraestrutura bázika, ami hakarak tenke tau prioridade, iha 2022. Estrada rurál, ita hakarak hadi’a atu komunidade bele asesu sira-nia produtu,” nia espera.

Iha fatin hanesan, Armando de Carvalho, nu’udar lider lokál ida mós, husi Postu Administrativu Hatolia revela, komunidade balun iha suku hitu hanesan Lemia kraik, Samara, Asulai Sare, Lemia sorin balun, Ailelo, Urahu, Suku Lore, iha Postu Administrativu ne’e mak seidauk asesu eletrisidade.

Suku ne’ebé asesu ona eletrisidade ho 75% mak Suku Fatubesi, Hatube, Lisapad, Hatolia Vila no Manusahe.

“Husu ba MOP katak ba suku sira ne’ebé liña eletrisidade iha ona bele tau ona prepagu atu nune’e sira bele kuidadu ita-nia enerjia eletrisidade ne’ebé dala barak liu komunidade uza estraga de’it”.

Imajen/Media PR.

Hatan ba preokupasaun Xefe Suku sira nian ne’e mak Ministru Obras Públika (MOP) Salvador Pires hateten, liga ho infraestrutura bázika; estrada, bee-moos no mós eletrisidade ne’e deskreve iha vizaun Oitavu Governu Konstitusionál nian.

Tanba ne’e, governante ne’e esplika katak tanba hakarak hametin konektividade liga área produtiva sira no mós merkadu atu nune’e bele hasa’e dezenvolvimentu sosiu-ekonómika iha Timor-Leste mak Governu hanoin katak investimentu iha estrada sira importante tebes ho manutensaun ba ativu estrada sira ne’ebé investe tiha ona iha tempu pasadu no sei kontinua hala’o.

Projetu sira ne’ebé MOP atu hala’o iha 2021 fahe de’it ba kategória infraestrutura purvolta 200 itál kilometru estrada; kategória estrada nasionál, urbana, munisipál no mós rurál ne’ebé MOP atu halo, liu-liu MOP haree ba reabilitasaun no manutensaun periodika rutina. Ne’eduni purvolta 900 itál kilometru estrada maka MOP atu mantein iha OJE 2021 iha liña ministeriál.

“Ha’u hakarak fahe detallu liu kona-ba projetu ne’ebé ita hala’o iha Munisipiu Ermera hanesan tuir mai ne’e iha setór estrada kategória estrada nasionál, husi Letefoho bá Hauba, Bobonaro distánsia 108 kilometru ne’ebé husi totál 18 kilometru progresu 39 kilometru, ita sei tau ba estudu iha item fundu infraestrutura iha estudu ne’ebé ita hanoin atu hala’o,” nia hateten.

Governante ne’e hatutan, iha tinan oin, Hatolia, Maliana 60 kilometru ne’ebé 10 kilometru kompletu ona 16.2 kilometru, sei tau ba estudu 34.4 kilometru. Iha ponte Gleno Vila, totál distánsia 6.4 kilometru depois preparasaun Tibar nian dezeñu hala’o hela. Agora, kategória estrada munisipál ba Ermera nian ho totál 77.5 kilometru ne’ebé MOP hala’o, entaun estudu viabilidade posibilidade sei implementa iha tinan 2021.

“Ita-nia target (alvu) katak dezeñu iha inisiu Janeiru 2021 ita bele avansa ba konstrusaun,” Ministru Salvador Pires garante.

Iha empréstimu ne’ebé Ministériu Finansa (MF) liuhusi Konsellu Ministru aprova tiha ona, tuir ministru, hein hela MOP materializa nia akrodu emprestimu ho parseiru sira, maka Hatubeliku, Ermera Letefoho distánsia 60 kilometru ne’ebé sei preparativu sira administrativu kompletu MOP bele hala’o mobilizasaun, implementasaun iha tinan oin mai.

Kategória estrada urbana iha totál 45.5 kilometru estrada urbana ho la’o 20 kilometru iha tinan oin 2021 nia preparasaun MOP sei halo ba dezeñu preparativu ne’ebé osan MOP tau iha fundu infraestrutura iha 2021.

Kategória ponte Ermera ne’ebé MOP hala’o totál distánsia 160 metrus ponte Bere Railaco, Railaco Kraik Railaco leten ho distánsia 20 metrus daudaun ne’e estudu viabilidade posibilidade MOP sei implementa iha 2021 nia osan MOP tau fundu infraestrutura.

Ponte Ermera Letefoho distánsia 4 metru MOP nia vizaun sei implementa iha 2021, ponte Gleno Ermera Antigu ho distánsia 100 metru MOP sei halo levantamentu estudu 2021. Agora ba kategória estrada rurál reabilitasaun MOP halo 26 kilometru, manutensaun rutina 34 kilometru. ida ne’e maka MOP halo ba iha Munisípiu Ermera.

Iha manutensaun rutina ne’e MOP sei halo ba Letefoho 10.5 kilometru, Punilala 3 kilometru, Atsabe mai Dili 11.6 kilometru, Lauana Lemia 3.8 kilometru, Poitete 3.5 kilometru.

Ba iha kategória reabilitasaun sei halo uluk 6 kilometru ba Manusahe, 10.1 kilometru ba Lemia, Ponilala 10 kilometru, Lauana Lemia 10 kilometru, Poitete 3.5 Samalete 4 kiloemtrus, Hatolia 3.kilometru Kalipia 10 kilometru, Fronteira Nisapa 10 kilometru, Haotlia Nemia kraik, Railaco Kraik, Railaco leten, Samaleten ne’ebé nia dezeñu balun MOP sei prepara ida ne’e maka kategória estrada.

Iha parte bee-moos, Ministru Salvador Pires akresenta, vizaun governu nian atu estabelese sentru integradu ne’ebé hakarak sustenta  oras 24 ba povu Ermera.

“Públiku sira hatene katak governu ida ne’e foin iha oportunidade atu halo investimentu 2020 maibé infelizmente OJE laiha. Ba oin ita hanoin atu halo sentru integradu iha Ermera. Saida maka ita halo 2019 ita prepara hela sentru integradu nia master plan (planu mestre) tanba Ernera seidauk iha ho munisipiu sira ne’ebé seidauk iha no mós halo estudu rua ida atu lori bee Railaco ne’e Gleno ba iha Dili no mós fornesimentu ba iha Ermera,” ministru ne’e hateten.

Kona-ba eletrisidade, governante ne’e dehan, iha tinan oin mai MOP hanoin katak atu halo tan ba sistema ligasaun distribuisaun ba eletrisidade ba suku sira ne’ebé seidauk hetan asesu liña eletrisidade iha suku 50 ne’e; hela 19 maka seidauk.

“Ita-nia planu ne’ebé iha ona, preparativu 2019 ita iha ona maka ohin loron Ermera no mós Aileu iha tiha ona restu iha faze preparasaun dezeñu; ita hala’o hela bainhira posibilidade tinan oin atu investe ita hala’o maibé haree mós orsamentu iha área eletrisidade,” governante ne’e konklui.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here