Ekipa Lalenok United FC hasai imajen hamutuk, hafoin sai Kampiaun iha Supertasa 2019, iha jogu ikus Liga Futeból Amadora (LFA) époka 2019 ne’ebé realiza iha sábadu (19/10), iha Estádiu Café Gleno-Ermera. Imajen Tatoli/Hortençio Sanchez

DILI, 19 novembru 2020 (TATOLI) –Kampiaun Supertasa Liga Futeból Amadora (LFA) époka 2019, Lalenok United FC, lori tempu mak foin bele simu prémiu osan ho valor $15,000,00 hosi komisaun organizadora Liga Futeból Timor-Leste (LFTL) tanba perturba ho situasaun surtu COVID-19 no mudansa estrutura Governu iha Sekretaria Estadu Juventude no Desportu (SEJD).

Notísia Relevante : Yance Susesu Lori Lalenok Kampiaun LFA 2019

Ho transferénsia  prémiu osan ne’ebé atrazu ne’e bele dehan prejudika uitoan kbi’it finanseira internal klube jigante ne’ebé nain mak Pedro Belo, atual Komandante Komandu Operasionál Nasionál (KKON) ho nia espoza Jenilda Gusmão. Maibé, buat hotu klube ultra pasa ho  di’ak. Make nune’e, Pedro Belo ne’ebé Agência Tatoli konfirma lakohi fó komentáriu kle’an no detallu.

Prezidente Lalenok United FC atual Komandante Komandu Operasionál Nasionál (KKON), Superintendente Xefe, Pedro Belo. Imajen Tatoli/Eugénio Pereira

“Osan tama tiha ona, foin lalais ne’e,”  Pedro Belo hateten ho resposta badak de’it, ohin, iha Dili.

Molok ne’e, Agência Tatoli husu mós klarifikasaun hosi Diretór Finansas Liga Futeból Timor – Leste (LFTL), Caetano Cárceres Correia, kona-ba transferénsia osan prémiu ne’ebé atrazu ne’e.

Caetano Cárceres Correia, relata katak osan supertasa (supertaça) nian halo ona pagamentu ba klube Lalenok United FC tanba ne’e laiha ona dívida ruma entre LFTL ho Lalenok United FC.

“Ami LFTL la’ós laiha osan para atu pagamentu, maibé apoiu hosi Sekretáriu Estadu Juventude no Desportu (SEJD) ba ami nia proposta ne’e $350,000,00 kada époka, maibé realidade akontese iha momentu ne’ebá SEJD redús tiha ba $276,000,00-resin de’it. ida-ne’e mak fó impaktu mai ami hodi hamosu dívida ba Lalenok iha époka 2019 hodi pendenti hela, maibé ami halo ligasaun ona ho Sekretáriu Estadu Juventude no Desportu iha setembru nia laran mak ami foin hetan rezultadu no ami halo kedan prosesu hodi halo transferénsia ba konta bankária Lalenok nian,” Diretór Finansas Liga Futeból Timor – Leste (LFTL), Caetano Cárceres Correia, klarifika hodi responde Agência Tatoli iha edifísiu LFTL, Bairru Formosa, Dili foin lalais ne’e.

Notísia Relevante : Lalenok Sai Kampiaun Super Tasa 2019

Iha parte seluk nia esplika, Supertasa époka 2019, LFTL hetan tulun liuhosi kanál ka kadoras rua ne’ebé apoiu hosi Sekretáriu Estadu Juventude no Desportu (SEJD) no Federasaun Futeból Timor – Leste (FFTL).

Sekretáriu Estadu Juventude no Desportu (SEJD), Abrão Saldanha, konversa ho Prezidente LFTL, Nilton Gusmão ho Sekretáriu Jerál FFTL, Nelio Isaac Sarmento, nu’udar mós eis Sekretáriu Estadu Juventude no Desportu. Imajen LFA/Dok.

“Tinan liu-ba ita hetan apoiu hosi kadoras rua, primeiru kadoras inti ne’e mak mai hosi SEJD tuir orsamentu ne’ebé mak Liga propoin ba  $350,000,00, maibé hosi alokasaun orsamentu hosi SEJD nian la kompleta tanba aloka de’it  $276,000,00-resin,” nia hateten.

Kanál finansiamentu ida-tan, nia hatutan, mak Federasaun Futeból Timor – Leste  (FFTL) ne’ebé apoiu montante orsamentu $150,000,00.

Orsamentu-sira ne’e, nia esklarese,  aloka ba primeiru iha kompetisaun mak prémiu de jogu ba klube sira iha primeiru divizaun no segunda divizaun. Osan hosi SEJD nian aloka hotu ba klube sira inklui mós hosi FFTL nian ne’e mak aloka hotu ba iha prémiu  jogu no kampiaun.

Nia hateten,  osan balu mós ita aloka ba iha “Match Commissioner” no arbitrajen ho total osan $30,000,00-resin, inklui  fee ba ema ne’ebé hili bola,  ba iha  ekipa primeiru sokorru no seguransa.

Jogadór no estrutura Lalenok United FC festeja vitória ne’ebé sira hetan iha Primeira Divizaun LFA époka 2019. Imajen LFA/Dok

Kona-ba osan prémiu jogu  no kampiaun, nia tenik aloka osan purvolta $300,00-resin,  primeiru divizaun prémiu jogu $2500,00 kada jogu, ba segunda divizaun $1500,00 kada jogu manan ho lakon.

“Iha kampiaun  LFA iha $15,000,00 ba iha supertasa $15,000,00, entaun ita kalkula ona osan ne’e $300,000,00-resin mak ita aloka ona ba iha klube sira,” nia katak.

Iha mós alokasaun osan ba operasionál no membru LFTL sira ba saláriu no subsídiu ba funsionáriu sira hamutuk $86,000,00.

“Osan sira ita hetan hosi parte rua nian bele dehan “habis pake” utilize hotu sei la rai restu iha ami-nia konta,” nia tenik.

Kona-ba patrosinadór sira iha 2015 to’o 2018 mak fó apoiu ba Liga maibé, tuir nia, iha 2019 laiha apoiu másimu hosi patrosinadór.

“Patrosinadór iha 2019 laiha apoiu. Maibé ita so hetan de’it apoiu ida kontinuasaun hosi ETO+ durante ne’e iha finanseiru direita no indireta.  Apoiu sira direita mak osan kuandu bainhira ami presiza, hanesan iha 2016 to’o 2018, ETO+ sempre fó osan ba ami ne’e $30,000,00, maibé nia halo pagamentu ba buat sira seluk indireta ne’e ami halo kalkulasaun ne’e hamutuk $75,000,00. Ida ne’e mak nia tipu logo  kompañia tau hadulas iha kampu ninin hanesan banner seluk tan,” Caetano Cárceres Correia tenik.

Sekretáriu Estadu Juventude no Desportu (SEJD), Abrão Saldanha, simu relatóriu hosi Prezidente LFTL, Nilton Gusmão hafoin re-eleitu ba Prezidente LFTL iha kongresu nasionál LFTL iha Dili, foin lalais ne’e. Imajen LFA/Dok.

Relasiona ho relatóriu ba SEJD no FFTL bainhira jogu remata LFTL sempre finalize no submete kedan. Tanba hosi parte SEJD nian alokasaun orsamentu ba iha parte-rua; ida 40% no ida 60%. Tantu 40% sira aloka mai iha Liga, Liga halo atividade implementa remata relatóriu submete kedan ba Governu no sira verifika loos tiha ona foin halo fali transferénsia ba 60% nian.

Hanesan mós iha FFTL nian halo pagamentu 40% no 60%, 40% ne’e LFTL halo relatóriu ba pois mak sira halo fali transferénsia 60% mai fali depois remata jogu 60% nian LFTL halo kedan relatóriu hodi hatama.

Durante Liga hala’o obstákulu boot ne’ebé mak LFTL enfrenta mak kampu ne’ebé ladún sufisiente atu LFTL hodi aselera atividade-sira.

Relatóriu LFTL iha ona SEJD nia liman

Agência Tatoli mós halo konfirmasaun ho Sekretáriu Estadu Juventude no Desportu Abrão Saldanha,  kona-ba relatóriu hosi Liga Futeból Timor – Leste  ne’ebé Sekretáriu Estadu rasik informa katak kona-ba jogu Liga époka 2019 nia relatóriu finanseira tama ona iha nia gabinete.

Sekretáriu Estadu Juventude no Desportu, Abrão Saldanha. Imajen SEJD/Dok.

“Relatóriu Liga Futeból nian tama ona ,antes ha’u mai no Sekretáriu Estadu sesante simu ona no ha’u mai hahú halo avaliasaun no verifikasaun interna liuhosi unidade inspesaun auditoria ba relatóriu sira-ne’e no agora daudauk iha hela prosesu hodi buka sira nia rekomendasaun oinsá atu ko’alia fila fali ho órgaun liga ne’e rasik,”  Sekretáriu Estadu Abrão  Saldanha hateten, foin lalais ne’e, iha nia knar fatin, SEJD.

Kona-ba relatóriu hirak ne’e rigor ka lae, Sekretáriu Estadu Abrão Saldanha konfirma katak, nia sei halo hela konfirmasaun hodi haree didi’ak justifikasaun relatóriu ba gastu osan sira-ne’e.

“Kona-ba transparénsia no kontabilidade sei esforsu interna Liga nian rasik oinsá mak buka transparénsia. Saida mak SEJD halo ba liga ne’e iha tinan oin mak hanoin ona atu halo tranzisaun ba Liga ne’e no órgaun Liga mós aseita ne’e mak muda hosi Liga Futeból Amadora ba Liga Futeból Timor – Leste no hahú koopera ho FFTL nune’e neineik-neineik SEJD atu redús nia apoiu hodi Governu bele investe fali iha nia baze, nia baze ne’e mak juveníl, saida mak agora ami halo mak redús orsamentu ne’ebé iha, ami tau osan sorin, FFTL tau sorin no órgaun Liga rasik aban-bairua buka osan rasik,”  Sekretáriu Estadu Abrão Saldanha esklarese.

Iha parte seluk nia dehan, osan ba klube kampiaun supertasa Lalenok United osan hotu halo ona transferénsia.

Nia dehan, bainhira LFTL seidauk halo pagamentu ba klube kampiaun Lalenok United FC, ne’e problema entre parte rua tanba tuir nia koñesimentu  osan hosi SEJD ho FFTL halo ona transferénsia ba LFTL.

Jornalista   : Hortencio Sanchez

Editór        : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here