Xefe Sentru Saúde Gleno, Munisípiu Ermera, José de Carvalho. Imajen Tatoli/António Gonçalves

GLENO,20 novembru (TATOLI)—Xefe Sentru Saúde Gleno, Munisípiu Ermera,  José de Carvalho, hateten durante ne’e sala internamentu sentru sáude ne’e enfrenta difikuldade, tanba fasilidade hanesan kama, kolxaun ho kolsa aat hotu ona.

“Ami iha ne’e kama, kulxaun hamutuk 20 no kolsa aat hotu ona, maibé ami uza nafatin hodi halo tratamentu saúde  ba pasiente sira,” dehan nia ba Tatoli iha ninia servisu fatin Gleno, kinta ne’e.

Notísia Relevante :Sentru Saúde Gleno kontinua halo promosaun saúde ba komunidade

Kona-ba ekipamentu sira ne’ebé oras ne’e aat ona, nia informa tanba uza ona durante tinan barak no seidauk hetan apoiu fasilidade foun husi Ministériu Saúde.

“Ami nia problema ne’e hato’o ona ba Serbisu Saúde Munisípiu  Ermera atu hatutan ba Ministériu Saúde hodi rezolve lalais tanba Ermera populasaun barak tebes, maibé to’o agora seidauk iha resposta,’’ nia hateten.

Maske nune’e, nia relata  foinlalais ne’e kompañia balun husi Ermera tulun ona kama foun 10 ba Sentru Saúde Gleno atu troka fasilidade balun ne’ebé aat ona.

”Foin lalais ita-nia kompañia balun iha Ermera  mak  ajuda  ami hamutuk kama 10  hodi troka  kama balun ne’ebé mak kleur ona iha ne’e ,’’ tenik tan.

Jornalista: Felicidade Ximenes

Editór :Agapito dos Santos

HAKEREK NO HATÁN

Please enter your comment!
Please enter your name here