Prezidente Repúblika, Francisco Guterres 'Lú-Olo'. Imajen Tatoli/Antonio Goncalves

ERMERA, 19 novembru 2020 (TATOLI)—Prezidente Repúblika, Francisco Guterres ‘Lú Olo’, hateten maske Orsamentu Jerál Estadu (OJE) 2021 nian sei iha audiénsia públiku iha Parlamentu Nasionál (PN) maibé Prezidente Repúblika hahú garante no lansa katak OJE 2021 sei pasa iha PN.

Notísia Relevante: PR Lú Olo hala’o diálogu aberta ho populasaun Ermera

“Governu ne’e halo tiha ona ninia planu ba rekuperasaun ekonómia ba rai ida ne’e. Ne’ebé, Orsamentu Jerál Estadu (OJE) tinan fiskál 2020 nian pasa tiha ona no ha’u aprova ona. Agora, iha tan OJE 2021 nian ne’ebé Parlamentu Nasionál (PN) sei halo hela audiénsia públika para rekolla ema hotu nia hanoin depois ikus mai debate no aprova iha PN. Ha’u garante katak OJE 2021 sei pasa iha Parlamentu Nasionál,” Prezidente Repúblika Lú Olo hateten bainhira hamutuk ho espoza Cidália Mouzinho Nobre halo diálogu aberta ko populasaun Ermera Ermera ho tema “Ho Diálogu Sei Hetan Solusaun Ba Problema Ne’ebé De’it” iha salaun parókia Nossa Senhora Gleno, Munisípiu Ermera, kinta ne’e.

Entretantu, Xefe Estadu ne’e mós esplika, Governu nia hakarak mak dadaun ne’e sira fó prioridade ba edukasaun tenke tau osan maka’as ba saúde para garante povu nia saúde, tenke hadi’a eskola, bee-moos ba komunidade sira no produsaun no produtividade.

“Buat ne’ebé ha’u hatene hosi Governu nia hakarak mak dadaun ne’e sira fó prioridade ba edukasaun tenke tau osan maka’as ba saúde para garante povu nia saúde, tenke hadi’a eskola para sai di’ak no ho kualidade, bee-moos ba komunidade sira no produsaun no produtividade para hasa’e rendimentu populasaun nian, ne’ebé aposta ho orsamentu 2021 nian ne’ebé iha hela PN,” Xefe Estadu ne’e hateten.

Entretantu Orsamentu Jerál Estadu 2021 nian ne’ebé Governu submete ona ba PN iha 15 outubru 2020 ne’ebé daudaun ne’e komisaun sira iha PN tama ona ba prosesu audiénsia públiku ho ministériu sira-ne’ebé ho totál orsamentu hamutuk billaun $1.895.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here