Imajen/Media PR.

ERMERA, 19 novembru 2020 (TATOLI)–Prezidente Repúblika Francisco Guterres Lú Olo apresia ho inisiativa Ermera-oan ne’ebé mak prodús kulat iha sira-nia suku laran.

Notísia Relavante: Agrikultór Fatukeru potensiál ho produsaun ai-kulat

“Horsehik mós ha’u ba haree grupu ida-ne’ebé prodús kulat. Ha’u hakfodak ho inisiativa ida-ne’e. Hakfodak no apresia tanba Ermera-oan sira rasik mak prodús kulat,” PR Lú Olo hateten bainhira hala’o diálogu ho populasaun Ermera iha Salaun Parókia Gleno, Ermera, kinta ne’e. 

Xefe Estadu ne’e mós afirma, populasaun Ermera kuda dadaun osan iha plástiku ne’ebé ekipa produsaun ai-kulit tau fini ba.

Imajen/Media PR.

“Osan ne’e iha ona plástiku laran, iha plástiku ne’ebé sira tau fini ne’e hodi prosesu ba produsaun kulat ne’e. Ha’u husu ba sira, ita boot sira prodús kulat ne’e, maizumenus ita-boot sira hatama iha merkadu ne’e kuantidade hira. Sira dehan kada fulan ida ami hatama ba iha loja kilograma rihun 70, entaun ha’u-nia laran hanoin hanesan ne’e 70.000 kilograma ne’e lori ba loja mais prezidente la hetan, ka kulat ne’e mak di’ak liu ne’ebé bainhira tama iha loja ema ba hola hotu kedas,” PR esplika.

PR Lú Olo hateten, nia parte hakfodak haree povu Ermera liuliu iha Suku Fatukeru ne’ebé hahú kuda osan iha plástiku laran liuhosi prodús kulat.

“Ha’u hakarak hatete katak, ida-ne’e inisiativa di’ak ida. Entaun, ita tenke aumenta tan, hakbi’it tan sira-nia kapasidade,” nia hateten. 

Prezidente Lú Olo hato’o lia hirak ne’e hafoin hala’o vizita ba grupu produsaun ai-kulat ne’ebé komunidade na’in hitu prodúz no hahú espande ona ba supermerkadu sira iha Kapitál Dili.

Entretantu, PR haktuir katak koordenadór grupu produsaun ba ai-kulat Corélio Gago mós esplika ba xefe estadu katak sei espande ba munisípiu sira seluk.

“Osan ne’e iha ona. Entaun sira hatete katak, ami iha esperiénsia ne’e, ami hakarak habelar liután ba munisípiu seluk hanesan Baucau tanba sira husu ona. Ainaro mós husu ona, para prodúz aumenta liután kulat ne’e iha ita-nia rai,” PR Lú Olo esplika tuir liafuan hosi koordendór ne’e. 

Aleinde ida-ne’e, Ministru Turizmu Komérsiu no Indústria (MTKI) José Lucas do Carmo da Silva mós orgullu ho komunidade ne’ebé iha inisiativa halo produsaun ba ai-kulat refere.

“Inisiativa hosi komunidade nian hodi prodús kulat ne’e inisiativa di’ak tebes ne’ebé presiza hetan atensaun hosi Governu. Tanba, ita haree horseik ne’e sira servisu ho báziku tebe-tebes. Tanba ne’e ba oin Governu sira buka hatene di’ak liután saida mak sira presiza para Governu ajuda,” Lucas hateten.

Atu hatene kle’an kona-ba produsaun kulat ne’e, Ministru ne’e sei haruka ekipa tékniku mai fatin produsaun hodi halo peskiza no buka hatene molok Governu apoiu saida mak grupu presiza.

Entretantu ekipa produsaun ne’ebé halo produsaun ba ai-kulat mutin ne’e kompostu husi ema na’in-hitu (7) ne’ebé fó ona kampu servisu ba ema na’in-rua (2) ne’ebé fatin produsaun iha Aldeia Palemanu, Suku Fatukeru, Postu Administrativu Railaco, Munisípiu Ermera.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here