Segundu Komandante PNTL RAEOA, Superintendente Nicolau Francelino da Costa. Imajen TATOLI/Antónia Gusmão

OÉ-CUSSE, 19 novembru 2020 (TATOLI)--Komando Polísia Nasionál Timor-Leste (PNTL) Rejiaun Administrativa Espesiál Oé-cusse Ambeno (RAEOA) menus rekursu (membru) inklui ekipamentu hodi apoia pesoál sira hala’o serbisu.

“Kona-ba númeru Polísia iha Oé-cusse ne’ebé atu koloka ba iha fatin-fatin, tanba haree ba área jeográfikamente rejiaun ne’e luan liga ho fronteira Indonézia, maka númeru ne’e la to’o atu koloka iha fatin balun,” Segundu Komandante PNTL Oé-cusse, Superintendente Polisía Nicolau Francelino da Costa, hateten iha ninia knaar fatin, Komando Polísia Oé-cusse, kinta ne’e.

Komandante Polísia interinu ne’e dehan, membru Polísia iha Komandu RAEOA hamutuk 148, ne’ebé hosi númeru ne’e koloka ba eskuadra rejionál haat hanesan Pante Makassar, Oesilo, Pasabe ho Baoknana.

“Kada eskuadra iha pesoál na’in-12 to’o 13, maibé la to’o no presiza nafatin atubele kobre hotu iha área sira ne’ebé iha tanba daudaun ne’e mós ami planea atu postu ida bele kontrola transporte sira iha fatin refere,” Segundu Komandante akresenta.

Maske nune’e, Ofisiál Polisiamentu Komunitária (OPS) koloka hotu ona iha suku sira iha rejiaun espesiál ne’e.

Kona-ba transporte hodi apoia pesoál sira hala’o serbisu iha terrenu, Komandante Polísia ho deviza aifunan rua ne’e esplika, karreta sira ne’ebé iha barak mak kondisaun a’at ona no presiza manutensaun, enkuantu dadaun ne’e karreta neen de’it mak di’ak.

Komandu hasoru difikuldade, liuliu kondisaun karreta operasionál hanesan roda a’at.

“Relasiona ho ida-ne’e, Komandu RAEOA husu apoia ba Komandu Jerál PNTL iha Dili maibé labele atende lalais entaun husu apoia ba autoridade RAEOA nune’e bele fasilita hodi halo serbisu,” nia hatutan.

Jornalista: Antónia Gusmão

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here