Xefe GPM, Azevedo Marçal. Imajen TATOLI/Florêncio Miranda Ximenes

DILI, 19 novembru 2020 (TATOLI)—Primeiru-Ministru (PM), Taur Matan Ruak, konvida ajénsia outónomu ne’ebé tutela ba Gabinete Primeiru-Ministru (GPM) atu prepara orsamentu ba tinan fiskál 2021 bazeia ba programa.

“Ohin enkontru importante lidera husi Primeiru-Ministru, konvida ajénsia outónomu sira hotu ne’ebé tutela ba Gabinete Primeiru-Ministru ho objetivu prinsipál prepara diskusaun proposta Orsamentu Jerál Estadu 2021 iha Parlamentu Nasionál (PN) iha faze jeneralidade no espesialidade,” Xefe GPM, Azevedo Marçal hateten, hafoin enkontru iha Pálasiu Governu, kinta ne’e.

PM Taur husu ba kada ajénsia atu aprezenta programa no prioridade, ne’ebé orsamentu tenke bazeia ba programa inklui justifikasaun, nune’e Xefe Governu bele intende hodi aprezenta ba PN.

“Primeiru-Ministru orienta prepara orsamentu ho baze ba programa, liuliu konsentra barak liu ba programa hira no saida de’it, sei halo iha tinan oin no rezultadu, inklui montante osan presiza mai ho justifikasaun,” nia akresenta.

Alende ne’e, PM husu rezultadu saida mak ajénsia outónomu sira hetan iha tinan ne’e liuhosi OJE 2020.

“Husu kona-ba rezultadu nune’e bainhira husu osan ba tinan oin, Primeiru-Ministru bele iha informasaun klaru hodi bele tranzmite iha Parlamentu Nasionál,” nia hatutan.

Ajénsia autónomu sira-nia orsamentasaun submete ona ba GPM no halo ona avaliasaun no estudu ho baze ba programa atu uniformiza.

“Ajénsia sira-ne’e hamutuk 10 resin no ida-idak ho ninia orsamentu, hahú husi millaun $1 to’o $5 ne’ebé sira rasik mak sei ezekuta,” nia esplika.

PM Taur mós informa, atu mellora planeamentu tau osan tenke iha rezultadu ho mekanizmu monitorizasaun ne’ebé di’ak.

“Orsamentu tenke tau tuir nesesidade, la’ós hakarak atu ita bele halo ho sistema ne’ebé rigorozu atu kontrola ezekusaun,” nia akresenta.

Instituisaun no ajénsia sira tutela GPM maka Sekretaria Estadu ba Igualdade no Inkluzaun (SEII), Servisu Nasionál Intelijénsia, Komisaun Interministeriál Seguransa, Sentru Integradu ba Jestaun Krize, Komisaun Funsaun Públika, Arkivu no Muzeu Rezisténsia Timorense (AMRT), Centro Nacional Chega (CNC), Ajénsia Teknolojia Informasaun no Komunikasaun (TIC TIMOR), Gabinete Apoiu Sosiedade Sivíl, Inspesaun Jerál Estadu, Institutu Nasionál Administrasaun Públika, no Konsellu Interministeriál ba Reforma Fiskál.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here