Logotipu PDHJ

DILI, 19 novembru 2020 (TATOLI) – Provedoria Direitu Umanu no Justisa (PDHJ), ohin, hala’o konsultasaun públiku  hodi halo revizaun ba planu estratéjiku periodu tinan 2021-2025.

Konsultasaun ne’e  sei hala’o durante loron rua  hosi loron 19 to’o loron 20 novembru, tinan ne’e, iha salaun auditória Ministériu Justisa, Caicoli, Dili, ne’ebé hetan partisipasaun hosi instituisaun Estadu, sosiedade sivíl, mídia, akadémiku, ajénsia  internasionál, inklui reprezentante sira hosi munisípiu ho Rejiaun Administrativu Espesiál Oe-Cusse Ambeno (RAEOA).

Provedora Direitu Umanu no Justisa (PDHJ-sigla portugés), Jesuína Maria Ferreira Gomes. Imajen Tatoli/Egas Cristovão

Iha diskursu Provedora PDHJ, Jesuína Maria Ferreira Gomes, hateten, objetivu hosi konsultasaun ne’e hodi rona ideia, sujestaun no rekomendasaun hosi parte hotu, nune’e bele kontribui ba dezenvolvimentu planu estratéjiku PDHJ nian. Tanba PDHJ nia  planu estratéjiku 2011-2020 ne’ebé antes ne’e trasa ona sei remata  iha tinan ne’e.

Nia hateten, atu halo revizaun fila-fali  ba planu  estratéjiku anterior hodi identifika meta estratéjiku ba atu implementa tuir mai.

“Agradese ba partisipante-sira hotu nia  disponibilidade mai hamutuk ho PDHJ iha semináriu no konsultasaun hodi rona ideia ba parte hotu hodi tradús polítika estratéjia ida di’ak liu tan ba PDHJ,” Provedora Jesuína Maria Ferreira Gomes hateten.

Provedoria Direitu Umanu no Justisa (PDHJ) estabelese ho Lei no kumprimenta ba  Konstituisaun Repúblika Demokrátika Timor-Leste iha artigu 27 nu’udar órgaun independente ida-ne’ebé iha funsaun  atu apresia no buka dalan atu atende sidadaun-sira nia keixa hasoru podér públiku, bele atu haree ida-idak la’o tuir lei ka la’e, prevene injustisa no hala’o prosesu atu hadi’a injustisa.

Tuir Jesuína Maria, atu bele implementa kna’ar ho di’ak, PDHJ halo ona polítika  no implementa ona planu estratéjiku ba tinan 10 hahú 2011 to’o 2020. PDHJ nia  planu estratéjiku 2011-2020 define meta estratéjika haat hanesan;

  1. Kona-ba autoridade públiku sira iha koñesidu ne’ebé di’ak kona-ba direitu umanu iha  nivel institusionál.
  2. Autoridade sira bele halo prevensaun no korresaun ba violasaun prinsípiu direitu umanu no boa governasaun.
  3. Ema vulneravel sira iha protesaun hasoru abuzu direitu umanu no bele hetan asesu di’ak ba atendimentu públiku
  4. Asesu PDHJ nia kapasidade no independénsia hodi garante implementasaun ba nia mandatu ho di’ak no iha konsultasaun ne’e PDHJ sei interpora  tan area jéneru nian.

 “Planu estratéjiku sai hanesan matadalan importante hodi orienta servisu PDHJ nian, programa no atividade-sira no ikus mai bele sukat atinjimentu liuhosi indikadór iha planu estratéjiku durante tinan 10 hosi atividade 77 konsege atinje 68 no 32 porsentu seidauk tanba ne’e ho konsultasaun ne’e atu halo reforma fila-fali,” Provedora Jesuína haktuir.

Provedora Jesuína Maria Ferreira Gomes, hatutan, hosi  konsultasaun ne’e mak atu fahe informasaun rezultadu servisu PDHJ nian durante tinan 10 bazeia ba prioridade estratéjiku haat ne’ebé mak define.

Jornalista   : Nelson de Sousa

Editór        : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here