Imajen TATOLI/Evaristo Soares Martins.

DILI,  19 novembru 2020 (TATOLI)– Governu liuhosi Vise-Ministru Interiór (Vise-MI) ho Centru Nacional Chega (CNC), ohin, asina nota intendimentu atu fó formasaun ba membru Polísia Nasionál Timor-Leste (PNTL) iha ámbitu kooperasaun ba Disemniasaun Informasaun Kona-ba Pasadu nian, Foramsaun Rezolusaun Konflitu, Direitu Umanu no Kampaña ba Promosaun Pás.

Vise-Ministru Interiór, António Armindo, hateten ho asina nota intendimentu ne’e atu Centro Nacional Chega (CNC) mós bele ajuda instituisaun seguransa (PNTL) hodi fó formasaun ba membru PNTL sira liuhósi Akademia PNTL nian ne’ebé mak agora daudaun iha, atu nune’e membru PNTL sira bele hatene liu kona-ba Diretu Umanu no sira bele servisu tuir padraun no konstituisaun ne’ebé mak iha.

‘’Ami iha dirasaun ida bolu dehan Konflitu Komunitáriu ne’ebé agora daudaun ne’e la’o hela no hetan apoiu másimu hósi United Natiods Women. Maibé agora daudaun ita iha tan CNC para bele reforsa liután ita-nia dirasaun ida-ne’e, atu nune’e sira bele hakbesik ba iha komunidade hodi koa’lia kona-ba saida mak Direitu Umanu. Sira mós bele halo diseminasaun kona-ba importánsia hósi seguransa ne’e oinsá,  atu nune’e seguransa sira bele besik ba povu ida-ne’e. Ita-nia intensaun ba asina nota intendementu ida-ne’e mak ne’e,’’ Vise-Ministru Interior,  António Armindo, ba jornalista sira hafoin ramata serimónia asina nota entendementu iha Salaun Konferénsia CNC, Antigu Komarka, Balide, Dili, kinta ne’e.

Entertantu, Diretór Ezekutivu Centro Nacional Chega (CNC), Hugo Maria Fernandes hateten, asina nota entendimentu ida-ne’e hanesan jestu polítika ida no responsabilidade Estadu Timor-Leste nian ba eransa ne’ebé mak Estadu husik hela.

“Ami ho Ministériu Interiór no liuliu sira-ne’ebé mak iha responsabilidade ba instituisaun seguransa sira hodi haree ba konteúdu balu hósi ita-nia istória pasada ne’e hodi introdús ba entidade seguransa sira no mós bele fó hanoin sira. Katak, sosiedade ida-ne’ebé mak loroloron sira serbí ne’e, sosiedade ida-ne’ebé mak mai hósi pos-konflitu ida no sosiedade ida-ne’ebé mak kontinua trauma hela ho aktu sira iha pasadu nian. Entaun, bele fó hanoin sira para sira-nia dezenpeñamentu ne’e banati tuir padraun internasionál, konsituisaun RDTL, no padraun operasionál sira,” nia dehan.

Asina nota intendimentu ne’e, nia hateten, atu foku ba oinsá mak Estadu Timor-Leste liuliu Governu inplementa daudauk rekomendasaun hosi relatóriu CAVR “Chega!’ balu, no rekomendasaun sira-ne’e rasik mai hósi esperiénsia Timor-Leste nian rasik ne’e kruel.

Tanba, nia informa, atu hetan ukun aan ida-ne’e prosesu naruk no moruk ho esperiénsia ne’ebé mak iha relasaun ba auto determinasaun. Ne’ebé, tuir nia, iha momentu ne’ebá ne’e iha konsekuénsia mós hamosu violasaun direitu umanu balu ba timoroan sira.

‘’Ita-nia esperiénsia ne’e hatudu katak entidade Estadu Indonézia nian sira, liuliu iha setór defeza no seguransa mak komete aktu violasaun direitu umanu sira-ne’e. Entaun, iha Tmor-Leste ne’ebé mak independente no demokrátiku ne’e, ita lakohi aktu violasaun sira uluk ne’e atu repete fila-fali. Ita mós hanoin katak intervensaun ida importante mak liuhósi informasaun no kontinua halo diálogu entre seguransa sira ho ita-nia komunidade no koa’lia ba sira kona-ba  servisu seguransa nian. Atu nune’e, komunidade sira bele lomprende no ba futuru labele mosu dezentendimentu beibeik. Tanba, dalaruma ladún iha komunikasaun ne’ebé di’ak mak sempre mosu hela de’it problema entre seguransa no komunidade sira,” nia dehan.

Nia hatutan, asina nota intendementu ne’e ho ninia durasaun to’o tinan haat (4) no tinan oin ne’e sei halo uluk módulu ba formasaun atu bele halo alokasaun rekursu depois koopera ho PNTL, atu nune’e komesa dezenvolve módulu ba PNTL sira.

“Durante ne’e, membru PNTL sira iha de’it treinamentu ba Diretu Umanu maibé la sistimatiamente prodús iha kuríkulu. Ba tinan oin, ita tenke esforsu hodi haree kuríkulu ida di’ak atu garante ba PNTL no sira selu-seluk,” nia hateten.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here