Segundu Komandante PNTL RAEOA, Superintendente Nicolau Francelino da Costa. Imajen TATOLI/Antónia Gusmão

OÉ-CUSSE, 19 novembru 2020 (TATOLI)–Komandu Polísia Nasionál Timor-Leste (PNTL) Rejiaun Administrativa Espesiál Oé-cusse Ambeno (RAEOA) liuhosi Unidade Patrullamentu Fronteira (UPF), kaptura timor-oan (oé-cusse oan) hanesan membru arte-marsiál husi Persaudaraan Setia Hati Terate (PSHT) balun tanba tama ilegál husi fronteira Oesilo mai territóriu nasionál.

“Foin lalais ami simu informasaun husi Unidade Patrullamentu Fronteira, katak sira kaptura ema na’in-neen hanesan Oé-cusse oan hotu, tanba ba sa’e sabuk iha Indonézia no filafali mai liu dalan ilegál, nune’e UPF kaptura no entrega ba ami hodi halo auto-identifikasaun,” Segundu Komandante PNTL RAEOA, Superintendente Nicolau Francelino da Costa, informa iha ninia knaar fatin, Komandu PNTL , kinta ne’e.

Notísia Relevante: Sa’e sabuk iha Atambua, PNTL fó “ultimatu” ba membru PSHT

Operasaun konjunta detein tan membru PSHT na’in-23

Komandante PNTL RAEOA interinu ne’e haktuir, hafoin ekipa investigasaun Komandu halo auto-identifikasaun, lori kedas ema hirak ne’e tama iha kuarentena hodi kumpre regra kuarentena loron 14, tanba Timor-Leste implementa hela Estadu Emerjénsia ligadu ho pandemia COVID-19.

“Prosesu ba sira na’in-neen iha rua, sira tenke tama kuarentena no seluk mak sira ba sa’e sabuk iha Indonézia no filafali mai liu dalan ilegál, momentu UPF halo kapturasaun ba sira hamutuk ho atributu arte-marsiál PSHT,” Komandante interinu ne’e hatutan.

Nia dehan, hafoin sira kumpre kuarentena no fila hikas bá ida-idak ninia hela fatin, Polísia sei bolu hodi submete ba investigasaun.

Ho akontesimentu ne’e, Komandante Polísia interinu ne’e apela ba sidadaun hotu, liuliu joven atu labele tama ilegál husi fronteira ka ne’ebé de’it.

“Daudaun mundu tomak inklui Timor-Leste luta maka’as hodi halo prevensaun ba moras COVID-19, tanba hanesan moras perigu tebes maski iha Timór rasik seidauk iha kazu ema mate,” nia akresenta.

Jornalista: Antónia Gusmão

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here