TDD. Imajen Tatoli /Dok

DILI, 19 novembru 2020 (TATOLI)-Tribunál Distritál Dili (TDD), ohin, halo audiénsia julgamentu  ba krime omisídiu tentada ne’ebé envolve hosi arguidu JS tanba hodi  katana “lere” ka taa lezada MSS, tanba de’it hamoos rai baliza kintál kafé nian.

Kazu ne’ebé akontese iha Postu Administrativu Letefoho, Munisípiu Ermera iha loron 18 outubru 2019 iha  tuku 08:00 dadeer, tanba de’it lezada MSS ho nia-aman hasé arguidu “lere” ka lori katana hamoos hela kafé du’ut ne’ebé pertense ba kintál lezada ho nia-aman nian.

Tuir autos ne’ebé arrola hosi Ministériu Públiku katak  momentu ne’ebá   lezada ho nia-aman AS ba iha kafé-laran hili ai-maran. Bainhira fila atu ba uma, hasoru arguidu na’in-rua “lere” fali lezada nia-aman nia to’os, tanba ne’e lezada nia-aman maka hasé arguidu na’in-rua ho  liafuan “hei”. Maibé, arguidu JS hamriik mai ho katana iha liman ba hasai lia-fuan la di’ak ba lezada nia-aman.

La to’o ho hasai lia-fuan de’it, maibé arguidu foti fatuk rua atu tuda lezada nia-aman, maibé la konsege. Arguidu JS mós hodi katana atu taa lezada nia-aman, maibé la konsege, no mai fali ba bolu nia maun hanesan arguidu mós ho inisiál C maka foin sira tun fali ba hasoru lezada ho nia-aman. Nune’e lezada nia-aman mós halai tiha hosi fatin ne’e no lezada mós halai ketak.

Mezmu nune’e, arguidu JS duni tuir lezada maka taa dala-rua tuituir malu kona iha lezada nia kotuk-laran sorin karuk halo lezada monu tun kedas ba rai no  bainhira lezada hadeer fali atu halai, arguidu JS kontinua taa tan iha lezada nia ulun sorin-loos dala-ida no taa dala-ikus tan iha lezada nia tilun tahan sorin karuk hodi  halo lezada nia ran sai maka’as,

Lezada halo esforsu duni hodi halai ba liu polísia Eskuadra Letefoho, foin arguidu nain-rua mós tuir ba.

Durante ne’e entre sira laiha problema tanba sira sei iha relasaun família. Lezada hetan kanek iha kotuk laran no família-sira lori ba halo tratamentu hodi suku lezada nia ulun no iha tilun tahan sorin-karuk.

Suku hotu tiha iha ospitál Letefoho kontinua transporta lezada mai  Ospitál Gleno no baixa durante kalan tolu maka fila ba uma.

To’o agora lezada nia sei kontinua simu ai-moruk iha segunda no kinta, kada semana tanba sei sente moras iha nia ulun.

Konsekuénsia direita no nesesáriamente hosi arguidu JS ninia konduta temi iha leten, halo lezada hetan kanek boot no ran sai maka’as iha nia ulun.

Autos Ministériu Públiku nian sita mós arguidu iha duni intensaun lori katana kro’at “lere” to’os no duni tuir lezada to’o taa kona iha lezada nia zona atinjidu ne’ebé nu’udar órgaun vital no sensitivu.

Lezada la konsege mate iha fatin, tanba ninia fíziku ne’ebé aguenta hodi halai to’o iha Eskuadra polísia hodi salva nia-an.

Arguidu JS hatene katak ninia hahalok-sira ne’e hotu bele hakotu ema nia vida, maske lezada la mate mas to’o agora lezada sei sente moras iha nia ulun no sei kontinua konsume ai-moruk.

Arguidu JS iha duni intensaun hodi pratika krime omisídiu simples ho forma tentadu, ne’ebé previstu no punidu tuir art. 138. art. 23.” Kódigu Penal.

Iha audiénsia julgamentu ne’e,  Tribunal seidauk rona deklarasaun arguidu no lezada-sira, tanba arguidu ida seluk la marka prezensa. Nune’e Tribunál adia hikas julgamentu ne’e ba iha loron 05 fevereiru 2021, iha tuku 16:00 Otl, hodi rona deklarasaun arguidu no sasin-sira.

Audiénsia ne’e prezide hosi Juiza Maria Solana, Ministériu Públiku reprezenta hosi prokuradór ida no arguidu hetan asisténsia legál hosi defensór públiku.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here