Ilustrasaun Violénsia. Imajen/Espesiál

OÉ-CUSSE, 19 novembru 2020 (TATOLI)–Komandu Polísia Nasionál Timor-Leste (PNTL) Rejiaun Administrativa Espesiál Oé-cusse Ambeno (RAEOA) rejista krime hamutuk 44 iha outubru 2020.

Husi totál ne’e, krime ne’ebé aas liu iha outubru mak ofensa integridade fízika simples hamutuk 21.

Tuir fali  mak krime kontrabandu (3), ameasa (4), mau tratu ba minor (4), koasaun seksuál (3), dano simples (1), violénsia doméstika (1), devasa (1), mau tratu ba kónjuge (2), tentativa (1), krime infantesidu (1), pekulatu (1), dezobidénsia (1), krime hasoru fauna no flora (1), no omesidu simples (1), furtu simples (1).

Segundu Komandante PNTL RAEOA, Superintendente Nicolau Francelino da Costa, hateten autoridade serbisu maka’as hodi halo prevensaun ba krime sira-ne’e, maski ho limitasaun rekursu maibé la hamate espíritu.

“Polísia Oé-cusse halo ninia serbisu haree liu ba terrenu, halo prevensaun ba kazu inklui eskuadra haat iha RAEOA. Liga ba kazu ne’ebé mak akontese ho númeru aas hanesan ofensa integridade fízika simples, kazu ne’e sempre sa’e maka’as maibé ami-nia ekipa sei serbisu hodi halo prevensaun,” Segundu Komandante Polísia relata iha ninia knaar fatin, Komandu PNTL, RAEOA, kinta ne’e.

Komandante PNTL Oé-cusse interinu ne’e hatutan, atu evita kazu sira ne’e maka Polisía Komunitária halo ona sosializasaun hodi prevene aktu krime sira ne’e iha sosiedade.

Aleinde ne’e, sosializasaun ba prevensaun konflitu no ba atividade polisiamentu komunitária, inklui sosiliazasaun prevensaun moras COVID-19.

Jornalista: Antónia Gusmão

Editora: Julia Chatarina  

HAKEREK NO HATÁN

Please enter your comment!
Please enter your name here