Reitor Iob, Agosto Soares. Imajen Egas Cristovão

DILI,19 novembru 2020 (TATOLI)—Magnífiku Reitór Institute of Bussines (IOB), Augostu da Conceição Soares, informa komesa tinan kotuk universidade privada ne’e simu ona estudante ho kategoria oan ki’ak hamutuk 200-resin husi Munisípiu Ermera, Aileu, Manufahi no Lautem.

Nia dehan Prezidente Autoridade Munisípiu idaidak maka rekomenda ba IOB atu simu estudante sira ne’e hodi estuda tanba laiha kbiit finanseira atu eskola.

Notísia Relevante :IOB gradua estudante finalista 356

“Ita iha tiha ona estudante kbi’it laek sira hamutuk 200-resin mak agora daudaun eskola iha IOB. Sira ne’e maihusi Munisípiu Ermera, Manufahi Aileu no Lospalos, agora tinan ne’e ita hahú tan ba Munisípiu Manatuto,” dehan Reitór IOB ba jornalista sira durante serimonia graduasaun ba estudante finalista 300-resin iha Kampus IOB Fomento Dili, ohin.

Kada fulan, nia dehan universidade aplika de’it propinas $10 ba estudante kbiit laek sira ne’e.

Hatan kona-ba programa Ministériu Ensinu Superiór Siénsia no Kultura atu integra oan kiak sira ba estuda iha universidade privada liuhosi rejime hakbi’it, Reitór IOB ne’e apresia no fó apoiu ba programa Governu Konstitusionál daualu ne’e.

“Ha’u hanoin programa MESSK nian atu integra estudante rejime hakbi’it sira ba Instituisaun Ensinu Superiór Privada ne’e ita hala’o tiha ona, maibé Governu kontinua haforsa tan ho bolsa estudu ba rejime hakbi’it sira ne’e diak liután,” nia dehan.

Notísia Relevante :Governu deside ona totál vaga 910 ba oan ki’ak asesu UNTL

Jornalista : Tomé Amado

Editór:Agapito dos Santos

HAKEREK NO HATÁN

Please enter your comment!
Please enter your name here