Ministra Saúde, Odete Maria Freitas Belo. Imajen Tatoli /Egas Cristovão

GLENO, 19 novembru 2020 (TATOLI)—Fundu Globál iha kinta ne’e asina nota intendimentu ida  ho Ministériu Saúde hodi apoiu osan hamutuk millaun $3.9 ba implementasaun programa prevensaun malaria iha Munisípiu 12 inklui Rejiaun Administrativa Espesiál Oe-Cusse Ambeno (REAOA) durante tinan tolu hahú 2021-2023.

Nota intendimentu ne’e asina diretamente husi Ministra Saúde, Odete Maria Freitas Belo ho Country Coordination Mechanism Globál Fund, Padre Francisco Barreto, iha salaun Servisu Saúde Munisípiu Gleno, Ermera ohin.

Notísia Relevante:Global Fund Fó Apoiu Fundu Globál $15.7 Millaun Ba Programa TBC

”Ita hetan tan apoiu husi fundu globál ba tinan tolu nian no provizoriumente ita hetan uluk fundu ba malaria nian maibé kona-ba tubercoluse no HIV/SIDA sei iha hela prosesu nia laran,” dehan Odete.

Iha fatin hanesan Reprezentante Country Coordination Mechanism,  padre Francisco Barreto informa apoiu ne’e atu halo eliminasaun no eradikasaun ba moras malaria.

“Ohin asina akordu atu aselera tan servisu maka’as iha parte hotu-hotu iha Ministériu Saúde nia laran no Governu tomak atu bele kontribui ba faze eliminasaun atu nune’e iha tinan 2022 ita bele simu ona sertifikadu husi mundu internasionál katak malaria iha Timor-Leste laiha ona,” nia hateten.

Nune’e mós Xefe Programa Nasionál Malaria Ministériu Saúde, Maria do Rosario de Fátima, agradese ba apoiu ne’e no iha ona alvu to’o 2022 Timor-Leste sei deklara ba mundu katak livre husi moras malaria.

“Orsamentu ne’ebé mak fundu globál apoiu ne’e ba Munisípiu 12 inklui Raeoa entaun husi ne’e mak ami aloka kada Munisípiu nian tuir nesesidade Munisípiu nian depois ida seluk ita fó prioridade ba sira ne’ebé mak iha kazu barak hanesan iha Munisípiu haat, Bobonaru, Oe-Cusse, Covalima no Dili,” nia hateten.

Notísia Relevante:2019, MS La Identifika Kazu Malária Iha Timor Leste

Jornalista : Felicidade Ximenes

Editór:Agapito dos Santos

HAKEREK NO HATÁN

Please enter your comment!
Please enter your name here