Autoridade sira hosi PGR, PSIK no HNGV hala’o destruisaun ba droga tipu sabu-sabu kilograma 3,253 iha HNGV, Dili, kinta 19 novembru 2020. Imajen Tatoli/António Gonçalves

DILI, 19 novembru 2020 (TATOLI)- Autoridade-sira hosi Prokuradór Jerál Repúblika (PGR) hamutuk ho Polísia Servisu Investigasaun Kriminál (PSIK) no Ospitál Nasionál Guido Valadares (HNGV), ohin,  hala’o destruisaun ba droga tipu sabu-sabu kilograma 3,253 iha HNGV, Dili.

Notísia Relevante : Tribunál kondena pena prizaun tinan-10 ba Jery Gabes Bunao

Destruisaun droga ne’e ho NUK:0010/20.PNSIC ezekuta tuir despaxu Prokuradór Jerál Repúblika iha loron 01 outubru 2020.

“Ami halo destruisaun ba droga ho tipu sabu-sabu kilograma 3,253, ne’ebé ninia prosesu remata ona iha Tribunál,” Prokuradora Lidia Soares, hateten.

Prokuradór Jerál Repúblika, José Ximenes ho Diretór Jerál HNGV, Aniceto Cardoso Barreto, hatudu hela droga ne’ebé atu halo destruisaun. Imajen Tatoli/António Gonçalves

Droga ne’e, autoridade seguransa Timor nian kompostu hosi Polísia Servisu Investigasaun Kriminál (PSIK), Servisu Informasaun Polísia (SIP), no Alfándega Timor-Leste halo apreensaun iha Aeroportu Internasionál Prezidente Nicolau dos Reis Lobato, Comoro, Dili hamutuk ho kondenadu ba kazu droga ne’ebé kumpre ona pena prizaun efetivu iha Prizaun Becora.

Droga ne’e mai hosi Nijéria to’o Timor-Leste iha loron 6 janeiru 2020 ho modus utiliza pesa karreta nian hanesan kompresór AC (Air Conditioner) ne’ebé hatama iha kompresór ninia laran no solda metin, nune’e bele dezvia atensaun autoridade sira.  Maibé, bainhira ekipa konjunta halo investigasaun tesi kompresór ne’e konsege hetan droga ne’e iha kompresór laran no falun metin ho plástiku kór kinur ne’ebé haruka liuhosi Ajénsia DHL iha loron 17 dezembru 2019 ho aviaun Citilink.

Prokuradór Lidia hatutan, kazu droga ne’e iha sekuénsia ho kazu droga anteriór ne’ebé kazál Timoroan lori ba Atambua-Indonézia iha loron (29/05/2019).

Iha fatin hanesan, Komandante PSIK, Superintendente Xefe, José Maria Neto Moc dehan, maske PSIK menus rekursu no ekipamentu, maibé sira-nia parte kontinua halo servisu másimu evita ema lori droga tama Timor-Leste.

Nia husu ba Governu Timor-Leste atu investe maka’as iha rekursu umanu no sosa fasilidade deteta droga nian hodi fasilita servisu polísia atu lori Timor-Leste labele sai fatin tránzitu ba droga.

Iha parte seluk, Diretór Jerál HNGV, Aniceto Cardoso Barreto dehan, haree hosi kontestu saúde nian, bainhira ema konsumu bele estraga ema nia saúde.

“Droga substánsia kímiku ida ne’ebé sei ita uza sala la’ós de’it halo ema kontente, maibé afeta ba  ema nia órgaun sistema  hotu- hotu,” nia hateten.

Doutór Aniceto husu ba juventude Timor-Leste atu kuidadu sira-nia aan hodi labele ransu livre no kuidadu atu labele konsumu kualkér ai-moruk droga hodi estraga sira vida.

Serimónia destruisaun asiste direita hosi Prokuradór Jerál Repúblika, José Ximenes akompaña hosi  ekipa prokuradór no parte Tribunál nian.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here