Sarani sira hala’o peregrinasaun ba sítiu Na’in-Feto iha Ramelau. Imajen Tatoli/António Gonçalves

DILI, 19 novembru 2020 (TATOLI)–Enkaregadu Turizmu Arkedioseze Dili, Padre Angelo Salasinha, hateten ba oin sei dezenvolve sítiu turizmu relijiozu,  nune’e bele dada turizta sira mai  Timor-Leste.

“Arkedioseze Dili identifika sítiu balun, maibé koñesidu iha mundu maka Na’in Feto Ramelau, seluk iha Fatubesi, Senhor do Morto iha Oé-cusse no sítiu seluk ne’ebé aban bain-rua sei sai patrimóniu mundiál iha Ázia maka Santo António iha Welalu, Same,”  Padre Angelo Salasinha informa, kinta ne’e iha Timor Plaza.

Tuir Amu  ne’e, Santo António iha Same daudaun seidauk dezenvolve no agora sei rai hela iha  rezidénsia padre sira.

“Ita seidauk dezenvolve didi’ak, agora sei rai hela iha komunidade Padre Franciscano sira no aban bain-rua kuandu iha santuáriu ruma, Ázia tomak sei mai iha ne’e tanba iha patrimóniu mudiál,” nia karesenta.

Aleinde ne’e, Cristo Rei mós sai prioridade, tanba ne’e maka hahú pilotu husi Ramelau maka ba turizmu relijiozu seluk.

Dioseze Dili mós sei dezenvolve sítiu antigu henesan igreja tuan sira, misionáriu sira-nia rate tuan atu sai fatin turizmu relijiozu.

Amu Angelo esplika, iha Oé-cusse Senhor do Morto bele sai peregrinasaun internasionál, maibé seidauk halo jestaun no organiza didi’ak.

Tanba ne’e, líder asosiasaun turizmu reliojiozu ne’e espera bele konsolida forsa hotu no bele la’o ho di’ak.

“Agora hein asosiasaun ida ne’e forte no sólidu liután,  nune’e ita hotu bele la’o hamutuk,” nia dehan tan.

Parte Dioseze Dili dezenvolvimentu fatin sira ne’e halo koordenasaun ho ekipa task force husi Ministériu Turizmu, Komérsiu no Indústria (MTKI), Ministériu Agrikutura no Peska (MAP), Ministériu Administrasaun Estatál (MAE) no Sekretaria Estadu Ambiente (SEA).

“Durante ne’e ita serbisu hamutuk ona ho Governu,  ita haree katak ekipa task force ne’ebé maka durante ne’e serbisu ho liña ministeriál agora daudaun kolabora hela,” nia akresenta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here