Ministru Obra Públika, Salvador Eugênio Soares dos Reis Pires. Imajen Tatoli/Egas Cristovão

ERMERA, 19 novembru 2020 (TATOLI)–Ministru Obras Públika (MOP), Salvador Eugênio Soares dos Reis Pires, iha ona polítika hodi halo reabilitasaun ba estrada sira iha Ermera liuliu iha área rurál entre aldeia no suku sira kuaze kilometru 60.

Tuir Governante ne’e hateten, la’ós halo manutensaun ba estrada iha Munisípiu Ermera maibé iha teritóriu nasionál ne’ebé kuaze kilometru 300 resin mak iha ona planu prioridade ba tinan 2021 nian.

“Kona-ba estrada hosi Seloi Aileu mai Gleno ita halo estudu hela ne’ebé iha tinan oin ita sei halo reabilitasaun. Maibé, reabilitasaun ba estrada iha teritóriu nasionál kuaze kilometru 300. Maibé, Ermera rasik iha kilometru 26 maibé iha mós manutensaun ne’ebé kuaze kilometru 30. Entaun, kuaze kolometru 60 ne’e iha 2021,” Ministru Obras Públika (MOP) Salvadór Pires esplika ba populasaun Ermera iha salaun parókia Gleno, kinta ne’e. 

Iha fatin hanesan, Prezidente Autoriedade Munisípiu Ermera (PAME), José Martinho dos Santos, hateten estrada hosi kapitál mai to’o Gleno di’ak maibé hosi Gleno ba postu seluk ladún di’ak.

“Estrada hosi Gleno ba Postu Administrativu Atsabe, Letefoho, Hatolia no Ermera Vila to’o Fatubesi, balun iha hela faze konstrusaun, balun sei aat hela no barak liu mak iha suku sira. Tanba dalan ba iha ne’ebá ne’e Estadu seidauk iha rekursu natón para atu rezolve situasaun sira ne’e,” nia dehan. 

Ale-nde ida-ne’e, Xefe Suku Dukurai Rafael Soares hateten iha Suku Dukurai rasik estrada ladi’ak.

“Iha ha’u-nia suku rasik iha aldeia 13, maibé estrada ba iha ami-nia suku rasik iha kilometru 18 maibé ladi’ak. Depois kona-ba eletrisidade mós iha aldeia hitu seidauk asesu no mós bee-moos ne’ebé povu hosi suku ne’ebá seidauk asesu,” nia dehan.

Jornalista: Osória Marques

Editór: Cancio Ximenes

2 KOMENTÁRIU

  1. Rehabilita estrada Ermera nian deit, oinsa ho ami nian neebe ligasaun ho Municipio Liquica ho Ermera nian?
    Toma mos medida ba ida nee.
    Bom trabalho Nai Ministro.

HAKEREK NO HATÁN

Please enter your comment!
Please enter your name here