Xefe GPM, Azevedo Marçal. Imajen TATOLI/Florêncio Miranda Ximenes

DILI, 19 novembru 2020 (TATOLI)—Iha Orsamentu Jerál Estadu (OJE) 2021, Gabinete Primeiru-Ministru (GPM) prioritiza apoiu finaseiru ba sosiedade sivíl iha Timor-Leste.

“Orsamentu Jerál Estadu 2021 ba GPM hamutuk millaun $10 iha programa prisipál haat, maibé apoiu sosiedade sivíl mak iha prosaun boot liu hamutuk milaun $6-resin, inklui programa apoiu finasiamentu ba organizasaun rezisténsia no organizasaun konvesaun relijioza, liuliu insitituisaun sira ne’ebé iha terrenu halo auditoria sosiál,” Xefe GPM informa, kinta ne’e, iha Pálasiu Governu.

Tuir nia, orsamentu  lubuk ida mak aloka ba Gabinete Sosiedade Sivíl tanba hakarak reforsa  papél sosiedade sivil sira Timor-Leste.

“Ita hakarak reforsa, la’ós tanba ita fó osan atu kontrola sira-nia opiniaun ne’e la’e, maibé atu kapasita no hakbiit sosisidade sivíl rai laran bele forte. Ita mós  la interven sira-nia outonomia no independesia,” nia akresenta.

OJE 2021, la foku ba relijiaun Katólika de’it maibé foku mós ba relijiaun seluk ne’ebé eziste ona iha Timor-Leste atu hetan orsamentu hanesan iha atividade sira.

Iha proposta OJE 2021, GPM prevee millaun $10,266 ne’ebé korresponde ba programa boot haat iha governasaun hanesan reforma estratéjika Estadu, apoiu sosiedade sivil, planeamentu, monitorizasaun, no avaliasaun no programa ikus mak boa governasaun no reforma institusionál.

Alokasaun orsamentu ba GPM hamutuk $10.266.544, fahe ba kategoria saláriu no vensimentu $506.233, bens no serbisu $3.208.489, kapitál menór $334.252, kapitál dezenvolvimentu $315.000, no transferénsia públika $5.902.580. 

Aleinde ne’e sei aloka verba balun ba medida prinsipál setór hitu hanesan reforsa governasaun liuhosi reuniaun regulár konsellu ministru, partisipasaun iha PN, asegura sólida reforma lejizlativa responsável pontu vista fiskál no reforsa relasaun esterna liuhosi Asosiasaun Nasaun Sudeste Aziátiku (ASEAN, sigla inglés) no Komunidade País ho lian Portugés (CPLP, sigla portugés). 

Seluk mak promove páz no seguransa iha territóriu liuhosi sistema koordenasaun ida integradu ba ekonomia lokál, promove reforma iha área planeamentu, monitorizasaun no avaliasaun hodi fortalese prosesu alokasaun rekursu públiku bazeia ba rezultadu foti desizaun.

Nune’e mós, asegura kontinuidade promosaun reforma estratéjika Estadu, promove abordajen integrada reforma liuhosi supervizaun reforma jestaun finansa públika inklui reforma fiskál iha administrasaun públika, hodi konstrui administrasaun públika ida efisiente no efikáz, apoiu kontinuamente sosiedade sivíl hodi halo promosaun inkluziva hodi dezenvolve nasaun no ikus liu reforsa boa governasaun no jestaun institusionál.

Iha programa reforma estratéjika Estadu, prevee iha kategoria bens no serbisu ho totál verba $544.400 no kapitál dezenvolvimentu ho valór $315.000, nune’e totál hamutuk $859.400 (8,4%). 

Apoiu sosiedade sivíl aloka iha kategoria bens no serbisu hamutuk $274.050 no transferénsia públika $5.902.250, ho totál hosi kategoria rua ne’e hamutuk $6.176.630 (60,2%). 

Enkuantu, iha programa planeamentu, monitorizsaun no avaliasaun aloka iha kategoria bens no serbisu ho valór $358.512 (3,5%). 

Programa boa governasaun alokadu iha kategoria salário no vensimentu hamutuk $506.233, iha kategoria bens no serbisu $2.031.527 no kategoria kapitál menór $334.252, totál hamutuk $2.872.012 (28%). 

Tetu agregadu no dezagregadu proposta OJE 2021 ho montante biliaun $1,895, fahe ba ketegoria saláriu no vensimentu millaun $239,26, bens no serbisu millaun $421,49, transferénsia públika millaun $669,91, kapitál menór millaun $61,14, no kapitál dezenvolvimentu millaun $503,20.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here