Jogadór DIT FC, selebra vitória bainhira hatama golu ba guarda rede Karketu Dili FC iha Tasa 12 Novembru , iha Estádiu Munisipál Dili, Tersa (18/11). Imajen Tatoli/António Gonçalves

DILI, 18 novembru 2020 (TATOLI) –Jogadór  DIT FC ho nia adeptu-sira kontente ho vitória  ne’ebé sira-nia ekipa oferese hodi “abate” Karketu Dili FC ho golu 3-0.

Joga iha Estádiu Munisipál Dili, ohin loraik,  jogadór DIT FC oferese vitória ba nia adeptu no  lori “gloria” ba DIT FC hodi hakat ba jogu tuir mai. Nune’e, Karketu Dili FC tenke sai hosi tasa 12 Novembru, epoka ne’e.

Jogadór DIT FC, kamizola azúl esforsu hela kontrola bola bainhira joga ho Karketu Dili FC iha Tasa 12 Novembru iha Estádiu Munisipál Dili, Tersa (18/11). Imajen Tatoli/António Gonçalves

Ritmu jogu bonitu hatudu hosi ekipa rua. Maibé, DIT FC lais liu hodi hatama golu-rua tuituir malu iha minutu 33 no minutu 35  hosi jogadór José Santos (7).  Nune’e, score DIT FC 2-0 hela ba Karketu Dili FC.

Hakat ba jogu segunda parte, ekipa Karketu Dili FC liuhosi nia treinadór Antonio Timotio halo mudansa ba estratéjia jogu atu nune’e bele prodús golu ruma. Maibé mudansa hirak ne’e hela de’it hanesan mudansa tanba la halo golu ruma.

DIT iha ona esperansa katak nia mak sei manan duni jogu ne’e, tanba haree ba rezultadu ne’ebé dook uitoan ona hosi Karketu Dili FC no sira tenta hamate tutuir Karketu nia jogu liuhosi jogu defensivu.

Sorte di’ak ba DIT FC tanba iha minutu 56 nia jogadór Venseslao Fatima (22) oferese  tan golu ida hodi haforte liután vitória DIT FC nian 3-0. Nune’e DIT FC iha oportunidade hakat ba jogu tuir mai iha tasa 12 Novembru ne’e.

Jornalista   : Hortencio Sanchez

Editór         : Francisco Simões 

HAKEREK NO HATÁN

Please enter your comment!
Please enter your name here