Eis Ministru Finansa VII Governu Konstitusionál no Prezidente Komisaun ba Elaborasaun Planu Rekuperasaun Ekonómika, Rui Gomes. Imajen TATOLI/Egas Cristovão

DILI, 18 novembru 2020 (TATOLI)Ekonomista timor-oan, Rui Gomes, nota katak aprezentasaun Orsamentu Jerál Estadu (OJE) 2021 hanesan orsamentu bazeia ba programa, tanba ne’e Ministériu Finansa (MF) presiza halo ezersísiu maka’as.

“Ita mós tama ona orsamentasaun programa, ne’ebé ita presiza haree atu Ministériu Finansa ne’e sai hanesan columna vertebrál ekonomia ho ninia funsaun atu suporta ekonomia atu dezenvolve iha Timor-Leste,” Rui Gomes tenik hafoin hasoru malu ho Xefe Governu iha Palásiu Governu, kuarta ne’e.

Notísia Relevante: Rui Gomes prontu asume kargu Ministru Finansa

Mandatu ramata, komisaun rekuperasaun ekonómika entrega planu ba PM Taur

Rui Gomes sei simu pose iha segunda oin ba kargu Ministru Finansa.

“Ha’u sei kontinua prioridade VIII Governu atu profunda liután hodi ita bele hadi’a jestaun finaseira liuhosi diversifikasaun finanseira hosi parte despeza no reseita, inklui hadi’a aprovizionamentu, no presiza mós fortalese sistema sentralizasaun finanseira,” nia dehan.

Maski nune’e, nia seidauk haree dokumentu kona-ba orsamentu, tanba ne’e hafoin simu pose nia sei konvoka enkontru ho Vise-Ministra Finansa Sara Lobo Brites inklui Diretór Jerál no Nasionál sira iha MF.

“Orsamentu ne’e la’ós ha’u mak prepara, ne’ebé ha’u sei estuda hafoin ko’alia no lori ba aprezenta iha Parlamentu Nasionál,” nia hatutan.

Ba OJE 2021, nia nota laiha problema tanba Timor-Leste nia ekonomia prátikamente tama resesaun iha tinan 2018 to’o 2020, maibé presiza rekupera ekonomia ho investimentu boot.

“Ita tenke rekupera ida ne’ebé lakon, entaun ita presiza investe maka’as iha ne’ebá, se lae labele ba oin. Maibé ita sei ko’alia tanba ha’u seidauk halo serbisu,” Prezidente Komisaun Elaborasaun Planu Rekuperasaun Ekonómika ne’e hatutan.

Nia promete sei tau ajenda prioridade ba sistema free balance atu hametin transpénsia iha ezekusaun orsamentu.

Entertantu, proposta OJE 2021 hamutuk biliaun $1,895, komposta hosi saláriu no vensimentu millaun $239,26, bens no servisu millaun $421,49, transferénsia públika millaun $669,91, kapitál menór millaun $61,14 no kapitál dezenvolvimentu millaun $503,20.

Iha tinan oin, VIII Governu Konstitusionál fó perioridade nasionál lima hanesan setór kapitál sosiál, dezenvolvimentu ekonómiku ne’ebé aliña mós atividade rekuperasaun ekonómika, infraestutura bázika no konetividade, dezenvolvimentu ambientál no reforma instutusionál.

Jornalista: Florêncio Miranda Ximenes

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here