Lansamentu Komboiu City Tour husi AEMTL iha Colmera, kuarta, (18/11). Imajen TATOLI/Natalino Costa

DILI, 18 novembru 2020 (TATOLI)–Asosiasasaun Emprezariál Feto Timor-Leste (AEMTL, sigla portugés), halo lansamentu Komboiu City Tour dahuluk iha Timor-Leste hodi bele fasilita turizta doméstika no estranjeiru sira vizita ba fatin turíztiku iha kapitál Dili.

Prezidente AEMTL interinu, Atha Sagran, hateten komboiu ne’e hahú halo operasaun husi sábadu ba rota tolu, Cristo Rei filafali mai sentru Burger King Colmera, rota ida to’o iha estátua João Paulo II Tasi Tolu, no rota ida tan mak to’o iha Palásiu Lahane.

“Komboiu ne’e loloos liu fatin sira sei esplika nu’udar fatin istóriku no prosesu atu asesu hotu mai iha Burger King Colmera, sosa billete ba kada ema ida $2 bá-mai no loke ba ema hotu,” Prezidente AEMTL interinu hateten liuhosi diskursu, kuarta ne’e, iha Burger King Colmera.

Kuantidade atu tula ema iha fatin rua, iha oin akumula ema 20 no iha kotuk ba ema 20.

“Komboiu ninia tuur fatin iha sintu no ema sa’e tenki iha billete, ne’ebé fa’an ba de’it ema 40 labele aumenta, tanba kadeira komboiu mak hansane,” nia aresenta.

Tuir Atha Sagran, inisiativa ba Komboiu City Tour hodi dezafia feto sira atu lansa tan viajen turíztika hanesan iha territóriu laran.

“Atividade ne’e bele promove turizmu komunitáriu, kulturál istóriku, relijioza no ekoturizmu, hodi liga membru AEMTL sira-nia produtu no servisu ba merkadu, nune’e bele fó retornu ekonómiku sustentável ba kada uma-kain iha baze,” nia hatutan.

Aleinde ne’e, atu promove destinasaun turíztiku no fortifika maluk feto sira-nia vida ekonómika.

Asosiasaun ne’e hetan apoiu hosi Ajénsia Internasionál Nasaun Unida ba Dezenvolvimentu (USAID) liuhosi ‘Tourism for all project’ ho fundu $40.000 ba manutensaun komboiu.

“AEMTL dezafia atu hola parte luta harii kompromisu setór privadu iha Timor-Leste. Ami iha planu estratéjiku maibé ho limitasaun, tantu rekursu umanu no finanseira, impata ami atu alkansa programa ho fásil maibé fiar metin ho kompromisu boot husi estrutura no membru tomak, ami nunka deziste tanba la’ós ami sé tan no la’ós agora bainhira tan,” emprezária ne’e subliña.

Nia agradese apoiu husi USAID no bele halo lansamentu ba atividade ne’ebé ninia impaktu multiplikativu no fó oportunidade ba maluk feto halo negósiu.

Tuir planu, AEMTL hakarak lansa Komboiu City Tour ba sidade munisípiu sira, nune’e bele fó informasaun ba sentru ne’ebé mak iha turizmu istóriku.

“Ami sei iha tan programa seluk maibé sei hetan dezafíu, tanba ne’e labele realiza dala-ida. USAID fó apoiu AEMTL ho planu ne’ebé iha tempu,” Atha Sagran akresenta.

MTKI apresia inisiativa AEMTL

Iha fatin hanesan, Diretór Jerál Turizmu, Ministériu Turizmu, Kmérsiu no Indústria (MTKI), José Quintas, konsidera inisiativa asosiasaun emprezariál feto ne’e importante tebes tanba liga ho turizmu istóriku.

Durante ne’e, MTKI kolabora hamutuk Centro Nacional Chega (CNC) atu promove sítiu istóriku iha kapitál Dili.

Tuir José Quintas, komboiu ne’e importante atu fasilita turista doméstika no internasionál, ne’ebé ba asuntu ne’e ministériu sei nafatin kontinua serbisu hamutuk ho parseiru dezenvolvimentu sira, hanesan AEMTL, USAID no seluk tan atu promove tan turizmu kruzeiru.

“VIII Governu Konstutuisionál nia programa no polítika iha setór turizmu maka promove turizmu doméstiku, nune’e presiza kolaborasaun parseiru dezenvolvimentu sira,” nia akresenta.

Diretór Jerál Turizmu ne’e hatutan, prezensa komboiu ne’e, ita sei servisu hamutuk hodi kontinua halo koordenasaun halo pakote viajen Dili laran inklui bele fasilita estudante sira ne’ebé atu koñese liután sítiu istóriku.

“MTKI fó apoiu no kontinua serbisu hamutuk AEMTL no parseiru dezenvolvimentu sira, nune’e hamutuk ho liña ministeriál, tanba setór turizmu ne’e boot no kompleksu,” nia dehan.

Seremónia lansamentu ne’e hetan partisipasaun hosi  dirijente MTKI, membru AEMTL, membru Kámara Komériu no Indústria Timor-Leste (CCI-TL), USAID, emprezáriu timor-oan sira, inklui entidade seluk.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here