Diretór Nasionál Empregu Esteriór SEFOPE, Filomeno Soares. Imajen Tatoli/Joanico de Araújo

DILI, 18 novembru 2020 (TATOLI)—Kandidatu traballadór timor-oan ba Seasonal Worker Programme (SWP) ne’ebé sei serbisu iha Austrália hosi munisípiu Dili hamutuk 13.174, kompostu hosi feto 5.068 no mane 8.106, balun pasa ona teste fíziku.

Diretór Nasionál Empregu Esteriór, Filomeno Soares, hateten teste  ne’e hala’o ona iha fulan kotuk dala-rua pur etapa tanba fatin atu realiza teste la sufisiente.

“Sekretaria Estadu Formasaun Profisionál no Empregu (SEFOPE) konklui hotu ona no agora fó sai rezultadu teste ho totál hamutuk ema na’in-3.709 maka pasa,” Diretór Nasionál ne’e informa ba Agência TATOLI, iha ninia knaar fatin, kuarta ne’e.

Notísia Relevante: Kandidatu traballadór SWP na’in-2.196 tuir teste fíziku etapa daruak

Nia esplika, hosi totál ne’ebé mak pasa, feto na’in-3.695 maibé pasa teste hamutuk 1.106 no sira ne’ebé la pasa hamutuk ema na’in-2.589.

Enkuantu, totál mane ne’ebé partisipa iha teste  fíziku hamutuk 6.639 maibé pasa  iha teste ne’e hamutuk 2.603 no la pasa hamutuk 4.036.

“Ami fó sai ona rezultadu maibé sira sei  teste tan iha faze daruak  ba lian inglés, nune’e  bele hatene sira-nia kapasidade,’’ Filomeno Soares hatutan.

Nia esplika, ba sira ne’ebé liu ona la signifika atu ba serbisu iha Austrália, maibé sei hein tan teste faze segundu iha lian inglés ne’ebé sei realiza tinan oin.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here