Imajen/Media PR.

GLENO, 18 novembru 2020 (TATOLI)—Ministra Saúde (MS), Odete Maria Freitas Belo, hateten Governu liuhosi Minsitériu Saúde haree katak dezenvolvimentu sira iha Munsípiu Ermera di’ak no Ministériu Saúde mós iha planu atu harii tan sentru saúde tolu iha Ermera inklui eleva mós sentru saúde sira ne’ebé iha tanba haree ba populasaun Ermera ne’ebé aas.

“Ministériu Saúde mós iha planu atu harii tan sentru saúde tolu iha Ermera inklui eleva mós sentru saúde sira ne’ebé iha tanba haree ba populasaun Ermera ne’ebé aas. Haree ba númeru populasaun Ermera ne’ebé aas entaun ita eleva liután saúde munisípiu nian para bele atende ba populasaun sira iha munsípiu ne’e,” Odete tenik.

Alende ne’e, Ministra Odete haktuir iha planu 2021 nian, Governu liuhosi Ministériu Saúde sei konstroi tan postu saúde hosi 11 to’o 19 iha territóriu Timor-Leste.

“Orsamentu jerál Estadu 2020 nian ita la fó prioridade ba kontrusaun maibé iha orsamentu 2021 nian sei aloka balun ba konstrui postu saúde iha munisípiu sira kuaze 11 to’o 19 inklui halo rezidénsia ba parteira sira no mós manutensaun ba postu saúde iha munisípiu balun ne’ebé Governu identifika ona. Tanba ita mós aloka iha kapitál minór, bens servisu hodi halo manutensaun postu saúde sira,” Ministra Saúde, Odete Maria Freiats Belo, esplika iha Ensinu Báziku Sentrál 10 Abril 99 Gleno, kuarta ne’e.

Entretantu, Ministra Saúde ne’e rekoñese katak moras infesaun vias respiratóriu (ISPA) kontinua invade no aas iha Munisípiu Ermera tanba kondisaun populasaun ne’ebé ladún fó atensaun ba labarik sira.

Governante ne’e hatutan, tanba laiha atensaun másimu hosi inan-aman ba oan sira mak moras infesaun vias respiratóriu afeta ba labarik sira inklui mós liuhosi hahan ne’ebé mak labarik sira konsumu.

“Bazea ba relatóriu ne’ebé mai hosi diretór saúde munisípiu nian katak moras ne’ebé númeru kontinua aas iha Munisípiu Ermera mak infesaun vias respiratóriu tanba ita-nia moris rasik depois liga mós ba diagnóstika no alerjia sira, udan inklui klima ne’ebé iha,” dehan MS, Odete Maria Freiats Belo, iha Ensinu Báziku Sentrál (Ebc-sigla portugés) 10 abril 99 Gleno, kuarta ne’e.

Nia dehan, moras infesaun vias respiratóriu ne’e barak liu mak afeta ba labarik sira tanba laiha atensaun másimu hosi inan-aman sira.

“Moras infesaun vias respiratóriu afeta ba labarik kiik-oan mak barak liu, depois moras ne’e hanesan alerjia no seluk tan. Tanba ne’e ita la presiza anti biótiku maibé presiza mak deskansa barak, hemu bee barak. Maibé iha mós kazu balun ne’ebé laiha tratamentu mak bele monu ba moras ne’ebé susar liu,” Ministra esplika.

Governante ne’e mós husu ba inan-aman sira atu kuidadu oan sira iha uma no estrada públiku, tanba dalaruma labarik sira halimar ba mai la uza xinelus no inan-aman la tau atensaun maka’as ba oan sira iha momentu ne’ebé rai rahun barak.

Notísia Relevante: Má-Nutrisaun kontinua aas iha Munisípiu Ermera, Bobonaro no RAEOA

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here