DILI, 18 novembru (TATOLI)—Diretór Eskola Ensinu Sekundáriu Jerál 5 de Maiu Becora Dili, Manuel Verdiál, hateten eskola ne’e iha estudante finalista hamutuk 729 maibé ema na’in 29 maka la tuir ezame nasionál ne’ebé hala’o ona durante loron tolu hahú loron 16 to’o 18 fulan-novembru 2020.
Nia esklarese husi estudante na’in 29 ne’e, estudante siénsia sosiál ema na’in 18 no siénsia naturál hamutuk ema na’in 11.
Notísia Relevante:Estudante finalista ESG na’in 20.145 sei tuir ezame nasionál
Ezekutivu ne’e hateten, estudante na’in 29 iha posibilidade bele tuir filafali ezame nasionál faze daruak bainhira sira aprezenta sira-nia an ba eskola hodi rekomenda ba Ministériu Edukasaun Juventude no Desportu (MEJD) para hetan aprovasaun.
Iha parte seluk, kona-ba pontu ezame nasionál ne’ebé mak MEJD prodúz, nia hateten la defisil tanba durante ne’e profesór sira hanorin ona ba estudante finalista sira.
“Ita apoiu estudante tuir matadalan no agrupamentu kuríkulu nasionál nian hodi husu ba eskola idaidak elabora ho didi’ak para bele hanorin,” nia hateten.
Manuel Verdiál fiar katak estudante finalista barak iha eskola ne’e sei hetan valór di’ak tanba konsege priénse materia hirak ne’e durante prosesu realizasaun ezame nasionál.
“Maske materia ne’ebé hanorin la kompletu tanba mosu tiha COVID-19 maibé ho rezumu ne’ebé mak ami fó ba estudante sira pelumenus bele apoiu ona sira iha Ezame Nasionál,” nia informa.
Entretantu, Vise Ministru Edukasaun Juventude no Desportu, António Guterres, hateten to’o ohin seidauk simu relatóriu finál kona-ba totál estudante finalista rihun 50-resin ne’ebé maka antes ne’e lista naran tama iha MEJD atu tuir ezame nasionál.
“Ita seidauk hatene totál estudante na’in hira mak la tuir ezame nasionál, maibé ita hein husi diretór sira kuandu ramata ona sira sei informa mai ita,” nia dehan ba jornalista sira iha Bekuse Dili, ohin.
Tuir kalendáriu MEJD nian katak prosesu koresaun materia ezame nasionál sei hala’o iha loron 23 fulan-novembru to’o loron 13 fulan-dezembru 2020.
Notísia Relevante:Estudante finalista 37 husi eskola tolu iha Dili la tuir EN
Jornalista :Tomé Amado
Editór:Agapito dos Santos
