Bankada CNRT hala'o konferénsia imprensa kona-ba governu laiha seriedade atu lori kadoras mai Timor-Leste. Imajen TATOLI/Evaristo Soares Martins.

DILI, 18 novembru 2020 (TATOLI)—Bankada Congresso Nacional da Reconstrução de Timorense (CNRT) nota VIII Governu Konstitusionál la sériu atu dada kadoras Greater Sunrise mai Timor-Leste.

Notisia Relevante: Dada kadoras labele ho vontade polítika de’it maibé presiza análize ekonómika

Bankada CNRT nota durante audiénsia ho Governu iha diskusaun ba projetu-Lei Orsamentu Jerál Estadu (OJE) tinan fiskál 2021, Governu, liuhosi Vise-Primeiru Ministru José Maria dos Reis no Ministru Petróleu no Minerál manifesta momoos sira-nia pensamentu mukit atu kontinua halo esforu hotu-hotu lori kadoras Greater Sunrise mai iha Timor-Leste.

“Governu kontinua foti pozisaun katak laiha estudu viabilidade atu dada kadoras Greater Sunrise mai iha Timor-Leste, dala barak sira tau mós kestaun ekonómika no komersiál hodi hafraku tiha Timor-Leste nia pozisaun atu obriga Australia no Kompañia Join Venture. Tanba tuir Governu katak labele obriga ho polítika no presiza kustu ne’ebé aas tebes atu dada Kadoras mai iha Timor-Leste,” Vise-Xefe Bankada CNRT, Patrocínio Fernandes dos Reis, informa liuhosi Konferénsia Imprensa, iha sal Bankada CNRT, kuarta ne’e.

Bankada CNRT hakarak deklara katak, karik laiha estudu viabilidade, Komisaun Konsiliasaun rasik mós sei la konkorda ho pozisaun Timor-Leste nian.

“Iha negosiasaun nia laran, Timor-Leste mak aprezenta ninia estudu viabilidade kompletu; bainhira Conoco Philips fó liuhosi Komisaun Konsiliasaun, Maun Bo’ot Kay Rala Xanana Gusmão dehan ba Komisaun katak dokumentus husi Conoco Philips ne’e lixu,” Vise-Xefe Bankada CNRT hateten.

Bankada CNRT konsidera razaun sira-ne’ebé Governu aprezenta hatudu katak, Governu foti ona pozisaun lakohi dada Kadoras mai iha Timor-Leste, hanesan uluk Partidu FRETILIN vota kontra ratifikasaun Fronteira Marítima permanente ho Australia.

“Agora Ministru sira hosi FRETILIN, inklui Prezidente TIMOR GAP buka razaun oioin hodi dezmantela pozisaun Timor-Leste atu dada Kadoras Greater Sunrise mai iha Timor-Leste. Sira kontra de’it sein aprezenta estudu foun ida hodi justifika sira-nia razaun labele lori Kadoras mai iha Timor-Leste,” nia dehan.

Bankada CNRT lamenta tebes ho pozisaun Governu nian ida-ne’e kona-ba destinu dada Kadoras Greater Sunrise ne’ebé sai tiha la klaru tanba loloos ne’e Timor-Leste iha pozisaun ne’ebé seguru liu agora atu dada Kadoras Greater Sunrise mai iha Timor-Leste.

Hafoin Timor-Leste iha Fronteira marítima permanente ho Australia, maioria Kampu Greater Sunrise lokaliza iha área Tasi Timor-Leste nian. Pozisaun seguru mós haree hosi partisipasaun asõens TIMOR GAP E.P. nian iha Join Venture; TIMOR GAP iha 56.56%, Woodside Energy 33.44% (Operadora), Osaka Gas 10%. Ida-ne’e hatudu forsa bo’ot Timor-Leste atu halo desizaun iha Komisaun Join Venture nia laran.

Relasaun ho inserteza Governu nian atu dada Kadoras Greater Sunrise mai Tasi Mane Timor-Leste, Bankada CNRT hakarak hateten ba públiku katak:

  1. Kampu Greter Sunrise maioria iha área Timor-Leste nian no liu metade asõens Join Venture na’in mak TIMOR GAP (Timor-Leste), pozisaun loloos Governu nian maka aseleira dezenvolvimentu Tasi Mane atu fó kondisaun adekuada ba seguransa Kadoras mai iha Timor-Leste.
  2. VIII Governu “defaktu inkonstitusionál” impoin tiha Planu Estratéjiku Dezenvolvimentu Nasionál (PED) no Programa VIII Governu Konstitusional atu dada Kadoras mai, nune’e bele masimiza dezenvolvimentu rikeza petróleu no gás liuhosi harii indústria petrolífera iha Kosta-Sul. Benefísiu barak mak Timor-Leste sei hetan tanba hasa’e partisipasaun povu, oportunidade servisu no kria bisnis oin-oin ba empreza Timor-oan sira.
  3. Timor-Leste sei lakon ninia soberania hanesan País soberanu ida, tanba, labele asegura ninia direitu ba rikusoin, halo ema seluk ka rai seluk hodi foti direitu Timor-Leste ba domíniu petróleu no gás iha Tasi Timor. Tanba-ne’e, ho razaun saída de’it Bankada CNRT sei diskorda ho pozisaun Governu nian. CNRT kontinua ezije atu Kadoras Greater Sunrise tenke mai iha Timor-Leste.

“Governu ne’ebé viabiliza hosi partidu FRETILIN daudaun halo esforsu atu sakrifíka tán Timor-Leste ninia rikusoin ba rai seluk, hahalok ida hanesan uluk liubá, Governu FRETILIN asina tiha akordu CMAT atu Timor-Leste ho AustrÁlia labele diskute Fronteira Marítima dentru tinan 50 nia laran. Ohin loron ita-hotu loloos tenke orgullu, onestu atu selebra vitória Fronteira Marítima ho Australia. Ho lideransa Maun Bo’ot Kay Rala Xanana Gusmão hamutuk ho nia ekipa negosiadór konsege mánan Fronteira Marítima, tanba sé Timor-Leste laiha kbiit ba negosiasaun, Timor-Leste ohin loron hateke de’it rai seluk mak explora rame-rame ita-nia rikeza iha Tasi Timor,” Bankada CNRT hateten.

Iha konferénsia imprensa ne’e akompaña hosi Xefe Bankada CNRT, Deputadu Duarte Nunes, Arão Noé de Jesus da Costa Amaral, Deputada Maria Fernanda Lay, Carmelita Caetano Moniz no deputadu sira seluk.

Bankada CNRT halo konferénsia imprensa ida-ne’e hodi hatán ba deklarsaun Ministru Petróleu no Rekursu Minerál, Víctor da Conceição Soares no Prezidente Timor Gap, António Loiola de Sousa.

Jornalista: Evaristo Soares Martins

Editór: Cancio Ximenes

2 KOMENTÁRIU

  1. sira laos lakohi dada kadoras maio Timor leste, maibe sira ne’e involevido ona ema ne’ebe uluk vota kontra ona ratifikasaun fronteira Maritima permanente ho Autralia ne’e, mak sira husi PF ne’e no aleinde ne’e mos dala ruma la iha kapasidade atu halo buat sira ne’e, ne’e mak uza meus oi-oin ne’e tanba ne’e defisil ba sira hodi dada kadoras mai Timor leste.
    dala ruma mos ita ukun la tuir dalan ne’e mos matebian rai lulik sira la fo kbit no matenek ba ita atu halo buat sira ne’e.

HAKEREK NO HATÁN

Please enter your comment!
Please enter your name here