Bankada CNRT hala'o konferénsia imprensa kona-ba governu laiha seriedade atu lori kadoras mai Timor-Leste. Imajen TATOLI/Evaristo Soares Martins.

DILI, 18 novembru 2020 (TATOLI)—Bankada Congresso Nacional da Reconstrução de Timorense (CNRT), hateten Austrália hetan 30% hosi kadoras Greater Sunrise tanba lokalizasaun jeografia hatudu perténsia ba Austrália.

Notísia Relevante: Konsekuénsia hosi tratadu FM halo Austrália sai na’in ba Greater Sunrise

Bankada CNRT argumenta kestaun ne’e hodi responde Prezidente Timor GAP, E,P, António de Sousa, hateten konsekuénsia hosi asina delimitasaun Fronteira Marítima (FM) halo Austrália mós sai na’in ba Greater Sunrise (GSR).

“Tanbasá 30% no 70% tanba jeografikamente tasi ne’e parte ida sei tama iha-ne’ebá (territóriu Austrália nian), la’ós Timor-Leste mak fó. Buat ida lokalizasaun jeográfika ne’e Maromak mak tau iha mundu, seráke señor Vise-Primeiru Ministru no Ministru Petróleu no Rekursu Minerál la hatene jeográfia,” Deputada Bankada CNRT, Maria  Fernanda Lay, informa liuhosi konferénsia imprensa iha sala bankada CNRT, iha Parlamentu Nasionál, kuarta ne’e.

Deputada bankada CNRT ne’e fundamenta, molok Timor-Leste manán fronteira marítima, mapeamentu Gretaer Sunrise nian barak liu maibé bainhira manán Austrália nian iha porsaun uitoan de’it.

Tanba ne’e mak, nia dehan, define iha proporsaun porsentu 70 ba Timor-Leste no porsentu 30 ba Austrália, se hosi kampu sira Greater Sunrise sei dezenvolvidu liuhosi gazodutu ida ba Timor-Leste.

Nune’e mós, iha proporsaun porsentu 80 ba Timor-Leste no porsentu 20 ba Austrália, se hosi kampu sira Greater Sunrise sei dezenvolvidu liuhosi gazodutu ida ba Austrália.

“Fronteira marítima manán tiha ita-nian boot liu, seráke sira (FRETILIN) la kontente tanba vota kontra (ratifikasaun tratadu fronteira marítima). Buat ida negósiu ne’e win win solution labele dehan buat hotu perténsia hotu ba Timor-Leste de’it entaun tenke fó parte balun hodi halo negósiu,” nia dehan. 

Entretantu, Deputada bankada CNRT, Carmelita Caetano Moniz, reforsa jeografiamente Maromak mak fó nasaun Austrália nia marítima hanesan ne’e.

“30% se ita dada kadoras Greater Sunrise mai Timor-Leste, maibé se dada kadoras ba Austrália sira hetan 20% de’it, sira fó tán 10% ba Timor-Leste. Signifka dada kadoras ba Austrália ninia vantajen boot liubá Austrália maibé Timor-Leste liuhosi líder Xanana Gusmão dehan kadoras tenke mai Timor-Leste,” Deputada Carmelita argumenta.

Kampu gás nian sira no kondensadu Sunrise no Troubadour, ne’ebé baibain koñesidu nu’udar kampu Greater Sunrise, lokaliza besik kilómetru 150 iha sudeste Timor-Leste nian no kilómetru 450 iha noroeste Darwin, Territóriu Norte nian.

Estudu viabilidade

Iha parte seluk, Deputada Bankada CNRT, Maria Fernanda Lay, hateten Gvernu fó-sai seidauk iha estudu maibé dezde 2008 to’o 2009 hala’o tiha ona pre-estudu viabilidade ho Petronas liuhosi estudu konseptuál sira  no iha tinan 2010 halo estudu ba marina kona-ba kadoras dada hosi tasi okos.

“Iha 2010 ne’e mós halo estudu viabilidade hatudu katak teknikamente no komersialmente viável. Iha 2012 teknikamente hatudu kadoras viavel atu dada mai Timor-Leste, iha 2013 halo tan estudu teknikamente no komersialmente konfirmadu atu kadoras mai Timor-Leste,” Deputada Lay hateten.

Nia hatutan, iha 2011 halo dala-ida tan estudu jeoteknikal no jeofizikál ba fasilidade marina no planta LNG tanba ne’e mak Timor-Leste halo preparasaun iha zona Tasi Mane ne’e.

“Depois 2012-2013 halo tan dala-ida estudu ba fasilidade marina ne’e rasik, sira hatete katak viável kadoras dada mai Timor-Leste iha 2015 no 2016 sira tama ba estudu konseptuál hodi define di’ak liután planta LNG inklui mós estimasaun esplorasaun ne’e rasik,” Deputada Maria Fernanda Lay hateten.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here